រូបភាពពីយានដ្រូនដែលត្រូវបានថតបានកាលពីថ្ងៃអាទិត្យ ទី៣១ សីហា បានបង្ហាញពីនាវាពិឃាតបំពាក់មីស៊ីលនាំផ្លូវរបស់កងទ័ពជើងទឹកសហរដ្ឋអាមេរិក USS Sampson DDG-102 បានចូលចតនៅជិតច្រកចូលព្រែកជីកប៉ាណាម៉ា ក្នុងពេលមានការប្រមូលផ្តុំកម្លាំងទ័ពជើងទឹករបស់សហរដ្ឋអាមេរិកយ៉ាងច្រើននៅក្នុងនិងជុំវិញភាគខាងត្បូងតំបន់សមុទ្រសការ៉ាអ៊ីប។

នាវាចម្បាំងអាមេរិកចំនួន៧គ្រឿង រួមជាមួយនាវាមុជទឹកវាយប្រហារលឿនដើរដោយថាមពលនុយក្លេអ៊ែរមួយគ្រឿង ស្ថិតនៅក្នុងតំបន់នោះ ឬត្រូវបានរំពឹងថានឹងទៅដល់ក្នុងពេលឆាប់ៗនេះ ដោយនាំយកនាវិក និងកងម៉ារីនជាង៤.៥០០នាក់។ ប្រធានាធិបតីសហរដ្ឋអាមេរិក លោក Donald Trump បាននិយាយថា ការប្រយុទ្ធប្រឆាំងក្រុមជួញដូរគ្រឿងញៀន គឺជាគោលដៅនៃរដ្ឋបាលរបស់លោក ហើយមន្ត្រីសហរដ្ឋអាមេរិកបានប្រាប់សារព័ត៌មាន Reuters ថា កិច្ចខិតខំប្រឹងប្រែងផ្នែកយោធាមានគោលបំណងដោះស្រាយការគំរាមកំហែងពីក្រុមជួញដូរទាំងនោះ។

ប៉ុន្តែវាមិនច្បាស់នោះទេថាតើវត្តមានយោធាអាមេរិកនឹងបង្អាក់ដល់ការជួញដូរគ្រឿងញៀនដោយរបៀបណានោះ។ ក្នុងចំណោមបញ្ហាផ្សេងៗទៀត ភាគច្រើននៃការជួញដូរគ្រឿងញៀនតាមសមុទ្រទៅដល់សហរដ្ឋអាមេរិកតាមរយៈមហាសមុទ្រប៉ាស៊ីហ្វិក ហើយភាគច្រើនជាអ្វីដែលធ្វើឡើងតាមតំបន់សមុទ្រការ៉ាអ៊ីបទៅដល់តាមជើងហោះហើរសម្ងាត់។ នៅពេលផ្តល់ព័ត៌មានបច្ចុប្បន្នភាពថ្មីៗអំពីលទ្ធផលពីប្រតិបត្តិការប្រឆាំងការជួញដូរគ្រឿងញៀននៅប្រទេសវ៉េណេស៊ុយអេឡាកាលពីថ្ងៃអាទិត្យ រដ្ឋមន្ត្រីការពារជាតិវេណេស៊ុយអេឡា លោក Vladimir Padrino បាននិយាយថា ប្រទេសរបស់លោកត្រៀមជាស្រេចដើម្បីប្រយុទ្ធ ប្រសិនបើសហរដ្ឋអាមេរិករំលោភលើដែនអធិបតេយ្យភាពរបស់ប្រទេសវេណេស៊ុយអេឡា។