ការស្ទង់មតិក្នុងវិស័យឯកជនបានបង្ហាញនៅថ្ងៃចន្ទ (១ កញ្ញា) នេះថា ការដំឡើងពន្ធរបស់សហរដ្ឋអាមេរិក បានធ្វើឱ្យប៉ះពាល់យ៉ាងទូលំទូលាយដល់សកម្មភាពរោងចក្រនៅទូទាំងអាស៊ី ក្នុងខែសីហា ប៉ុន្តែប្រទេសចិន បានបង្ហាញកំណើនដ៏គួរឱ្យភ្ញាក់ផ្អើល ដោយរក្សាសម្ពាធលើអ្នកបង្កើតគោលនយោបាយដើម្បីគាំទ្រដល់ការស្ទុះងើបនៃសេដ្ឋកិច្ចដ៏ផុយស្រួយក្នុងតំបន់។

ក្រុមអ្នកវិភាគនិយាយថា លទ្ធផលនេះបានពង្រឹងក្ដីបារម្ភថា ក្រុមហ៊ុនផលិតនៅអាស៊ី ដែលបាននិងកំពុងដឹកជញ្ជូនទំនិញនាំមុខគេ ដើម្បីផ្តួលការយកពន្ធខ្ពស់របស់សហរដ្ឋអាមេរិក អាចនឹងជួបការលំបាកក្នុងការបង្កើនប្រាក់ចំណេញដោយសារការនាំចេញធ្លាក់ចុះ ក្នុងប៉ុន្មានខែខាងមុខ។

ការស្ទង់មតិបានបង្ហាញថា សកម្មភាពផលិតកម្ម PMI របស់ជប៉ុន ឈរនៅ ៤៩,៧ពិន្ទូ ក្នុងខែសីហា ដោយប្រសើរឡើងពីតួលេខ ៤៨,៨ក្នុងខែកក្កដា ប៉ុន្តែនៅតែក្រោមកម្រិត ៥០ពិន្ទូដែលត្រូវការ ក្នុងរយៈពេលពីរខែជាប់គ្នា ចំណែក PMI ខែសីហារបស់កូរ៉េខាងត្បូង មាន ៤៨,៣ពិន្ទុ ខណៈកោះតៃវ៉ាន់ ក៏មើលឃើញអត្រាទន់ខ្សោយផងដែរក្នុងខែសីហា ដែលទាំងអស់នេះបានគូសបញ្ជាក់ពីបញ្ហាដែលអាស៊ីកំពុងប្រឈមពីពន្ធគយរបស់អាមេរិក។

ទិន្នន័យផលិតកម្ម PMI ទូទៅរបស់ចិន ពីស្ថាប័ន S&P Global បានបង្ហាញភាពភ្ញាក់ផ្អើលនៃកំណើនដល់ ៥០,៥ពិន្ទុ ក្នុងខែសីហា ពីតួលេខ ៤៩,៥ ក្នុងខែកក្កដា ដោយបានយកឈ្នះការព្យាកររបស់ទីផ្សារ និងលើសពីបន្ទាត់ ៥០ពិន្ទុ ដែលលាតត្រដាងពីកំណើននៃទិន្នន័យបញ្ជាទិញបែបនេះ៕