កាសែត The Guardian បាននិយាយដោយដកស្រង់សម្តីមន្ត្រីចក្រភពអង់គ្លេស ដែលមិនបញ្ចេញឈ្មោះម្នាក់ថា ចក្រភពអង់គ្លេស នៅតែមានបំណងទទួលស្គាល់រដ្ឋប៉ាឡេស្ទីនមួយ នៅក្នុងខែកញ្ញា។

មន្ត្រីរូបនេះ បាននិយាយថា៖«យើងនឹងវាយតម្លៃកត្តាទាំងអស់ដែលទាក់ទងនឹងការទទួលស្គាល់ ប៉ុន្តែនៅមានរឿងជាច្រើនទៀត យើងកំពុងស្ថិតនៅលើផ្លូវឆ្ពោះទៅរកការទទួលស្គាល់នេះ នៅពេលក្រោយនៅក្នុងខែកញ្ញា»។

ជំហរនេះ ត្រូវបានគេរំពឹងថា នឹងត្រូវបានបញ្ជាក់ជាផ្លូវការដោយរដ្ឋមន្ត្រីការបរទេសលោក David Lammy ក្នុងអំឡុងពេលសុន្ទរកថារបស់លោក នៅសភានៅថ្ងៃទី ០១ ខែកញ្ញានេះ។

កាលពីថ្ងៃទី ២៩ ខែកក្កដា ការិយាល័យរបស់នាយករដ្ឋមន្ត្រីអង់គ្លេសលោក Keir Starmer បានចេញសេចក្តីថ្លែងការណ៍មួយ ដោយលើកឡើងថា ប្រសិនបើអ៊ីស្រាអែល បន្តរារាំងការផ្តល់ជំនួយមនុស្សធម៌ ដល់តំបន់ហ្កាហ្សា ទីក្រុងឡុងដ៍ នឹងទទួលស្គាល់រដ្ឋប៉ាឡេស្ទីន នៅមុនសម័យប្រជុំនៃមហាសន្និបាតអង្គការសហប្រជាជាតិខែកញ្ញា។

កាលពីថ្ងៃទី២៤ ខែកក្កដា ប្រធានាធិបតីបារាំងលោក អេម៉ានុយអែល ម៉ាក្រុង (Emmanuel Macron) បានប្រកាសថា ទីក្រុងប៉ារីសនឹងទទួលស្គាល់រដ្ឋប៉ាឡេស្ទីន នៅក្នុងសម័យប្រជុំមហាសន្និបាតអង្គការសហប្រជាជាតិ។

យោងតាមសារព័ត៌មានរ៉យទ័រ អ៊ីស្រាអែលកំពុងសម្លឹងមើលការបញ្ចូលតំបន់វេសបែង( West Bank)ជាឧបសម្ព័ន្ធរបស់ខ្លួន ដែលជាជំហានឆ្លើយតបទៅនឹងចំណាត់ការរបស់រដ្ឋអឺរ៉ុប។