ប្រធានាធិបតីអាមេរិក លោក ដូណាល់ ត្រាំ បានប្រកាសថា ឆ្មាំជាតិបានប្រឹងប្រែងកម្ចាត់ឧក្រិដ្ឋកម្មអស់ពីទីក្រុងវ៉ាស៊ីនតោន ក្នុងរយៈពេលតិចជាងពីរសប្តាហ៍។

លោកបានសរសេរនៅលើបណ្តាញសង្គម Truth Social ថា៖ «ឥឡូវនេះ ទីក្រុងវ៉ាស៊ីនតោន គឺជាតំបន់គ្មានឧក្រិដ្ឋកម្ម ក្នុងរយៈពេលតែ ១២ថ្ងៃ ប៉ុណ្ណោះ»។

នៅថ្ងៃទី ១១ ខែសីហា លោក ត្រាំ បានប្រកាសថា ទាហានឆ្មាំជាតិ នឹងត្រូវបញ្ជូនទៅទីក្រុងវ៉ាស៊ីនតោន ដើម្បីដោះស្រាយឧក្រិដ្ឋកម្មដែលកំពុងកើនឡើង។ មេដឹកនាំសហរដ្ឋអាមេរិករូបនេះ បាននិយាយថា លោកនឹងដាក់នាយកដ្ឋាននគរបាលរបស់ទីក្រុងនេះ ឲ្យស្ថិតនៅក្រោមការគ្រប់គ្រងសហព័ន្ធដោយផ្ទាល់ ហើយថា កងកម្លាំងប្រដាប់អាវុធ អាចចូលរួមក្នុងការរក្សាសណ្តាប់ធ្នាប់ នៅក្នុងទីក្រុងវ៉ាស៊ីនតោន ប្រសិនបើចាំបាច់។

កាលពីថ្ងៃទី ២២ ខែសីហា លោក ត្រាំ បាននិយាយថា លោកបានត្រៀមខ្លួនរួចជាស្រេច ក្នុងការប្រើប្រាស់ធនធានរបស់រដ្ឋាភិបាលសហព័ន្ធ រួមទាំងកងកម្លាំងប្រដាប់អាវុធ ដើម្បីដោះស្រាយឧក្រិដ្ឋកម្ម នៅក្នុងទីក្រុងធំៗរបស់សហរដ្ឋអាមេរិកដូចជា ទីក្រុង Chicago និងទីក្រុង New York ជាដើម។