អ្នកនាំពាក្យយោធារបស់ចលនានេះ លោក Yahya Saria បាននិយាយថា ក្រុមឧទ្ទាមហ៊ួទីមកពីចលនា Ansar Allah ដែលមានមូលដ្ឋាននៅប្រទេសយេម៉ែន បានបើកការវាយប្រហារដោយមីស៊ីល ទៅលើនាវាដឹកប្រេង Scarlet Ray ដែលពួកគេអះអាងថា ជាកម្មសិទ្ធិរបស់អ៊ីស្រាអែល នៅសមុទ្រក្រហម។  

លោកបានប្រាប់ទូរទស្សន៍ Al Masirah ដែលគ្រប់គ្រងដោយក្រុមហ៊ួទីថា៖«អង្គភាពកងទ័ពជើងទឹកនៃកងកម្លាំងប្រដាប់អាវុធយេម៉ែន បានធ្វើប្រតិបត្តិការយោធាដោយបាញ់មីស៊ីលផ្លោង ទៅកាន់នាវាដឹកប្រេងអ៊ីស្រាអែល Scarlet Ray នៅភាគខាងជើងនៃសមុទ្រក្រហម»។ លោក Saria បន្ថែមថា នាវានេះ ត្រូវបាន «វាយប្រហារដោយផ្ទាល់»។

យោងតាមសេវាតាមដាននាវា MarineTraffic បានឲ្យដឹងថា សញ្ញាមួយចេញពីនាវាដឹកប្រេងដែលមានទង់ជាតិលីបេរីយ៉ា Scarlet Bay ដែលផ្ទុកប្រេង និងគីមីឥន្ធនៈ ត្រូវបានទទួលចុងក្រោយប្រហែល ១១ម៉ោងកន្លះមុន នៅម៉ោង ៦:៤៦ល្ងាច ម៉ោងសកល នៅថ្ងៃទី ៣១ ខែសីហា នៅពេលដែលនាវានេះ ចតនៅជិតកំពង់ផែ Yanbu របស់អារ៉ាប៊ីសាអ៊ូឌីត។

ប្រតិបត្តិការពាណិជ្ជកម្មដែនសមុទ្ររបស់ចក្រភពអង់គ្លេស (UKMTO) បានទទួលរបាយការណ៍អំពីឧប្បត្តិហេតុមួយ នៅចម្ងាយ ៤០ម៉ាយ ក្នុងសមុទ្រភាគនិរតីនៃទីក្រុង Yanbu កាលពីល្ងាចថ្ងៃអាទិត្យ។ UKMTO បាននិយាយថា នាវិក «បានឮសំឡេងខ្លាំងៗ» និង «បានឃើញការផ្ទុះ» ពីមីស៊ីលដែលមិន    ស្គាល់អត្តសញ្ញាណ។ ពុំមាននរណាម្នាក់ រងរបួសទេ។ សារព័ត៌មានរ៉យទ័រ បានរាយការណ៍នៅពេលក្រោយដោយដកស្រង់សម្តីក្រុមហ៊ុនសន្តិសុខដែនសមុទ្រអង់គ្លេស Ambrey ថា នាវាដឹកប្រេងដែលរងការវាយប្រហារនៅជិតកំពង់ផែ Yanbu គឺជាកម្មសិទ្ធិរបស់អ៊ីស្រាអែល។