មន្ត្រីប៉ាឡេស្ទីន និងសាក្សី បាននិយាយថា អ៊ីស្រាអែល បានបញ្ជូនរថក្រោះជាច្រើនគ្រឿងចូលជ្រៅទៅក្នុងទីក្រុងហ្កាហ្សា ហើយបានបំផ្ទុះរថយន្តផ្ទុកគ្រឿងផ្ទុះ នៅជាយក្រុងមួយ ខណៈការវាយប្រហារតាមអាកាស បានសម្លាប់មនុស្សយ៉ាងហោចណាស់ ១៩ នាក់ នៅថ្ងៃចន្ទនេះ។ 

របាយការណ៍អំពីការវាយលុកនេះ បានកើតឡើង នៅពេលដែលប្រធានសមាគមអ្នកស្រាវជ្រាអំពើប្រល័យពូជសាសន៍ឈានមុខគេរបស់ពិភពលោក បាននិយាយថា ខ្លួនបានអនុម័តសេចក្តីសម្រេចមួយ ដោយនិយាយថា លក្ខណៈវិនិច្ឆ័យផ្លូវច្បាប់ ត្រូវបានបំពេញ ដើម្បីបង្កើតថា អ៊ីស្រាអែលកំពុងប្រព្រឹត្តអំពើប្រល័យពូជសាសន៍ នៅក្នុងតំបន់ហ្កាហ្សា។

ពុំមានការឆ្លើយតបភ្លាមៗពីអ៊ីស្រាអែលលើការវាយលុកដែលបានរាយការណ៍ឬលើសេចក្តីថ្លែងការណ៍របស់សមាគមអន្តរជាតិនៃអ្នកស្រាវជ្រាវអំពើប្រល័យពូជសាសន៍នោះទេ។ នាពេលកន្លងទៅ អ៊ីស្រាអែលបានបដិសេធយ៉ាងដាច់អហង្ការចំពោះការលើកឡើងថា សកម្មភាពរបស់ខ្លួននៅតំបន់ហ្កាហ្សា ស្មើនឹងអំពើប្រល័យពូជសាសន៍។

យោធាអ៊ីស្រាអែលបាននិយាយថា កងកម្លាំងរបស់ខ្លួន កំពុងបន្តប្រយុទ្ធជាមួយក្រុមហាម៉ាស នៅទូទាំងតំបន់ជុំវិញ ហើយក្នុងរយៈពេលមួយថ្ងៃកន្លងទៅនេះ បានវាយលុកលើរចនាសម្ព័ន្ធ និងប៉ុស្តិ៍យោធាជាច្រើន ដែលត្រូវបានប្រើ ដើម្បីធ្វើការវាយប្រហារលើកងទ័ពរបស់ខ្លួន។

អ្នកស្រុកបាននិយាយថា កងកម្លាំងអ៊ីស្រាអែល បានបញ្ជូនរថពាសដែកចាស់ៗ ចូលទៅក្នុងផ្នែកភាគខាងកើតនៃសង្កាត់ Sheikh Radwan ដែលមានមនុស្សកកកុញ បន្ទាប់មកបានបំផ្ទុះពួកគេពីចម្ងាយ ដោយបានបំផ្លាញផ្ទះជាច្រើនខ្នង និងបង្ខំឲ្យគ្រួសារជាច្រើនទៀតរត់ភៀសខ្លួន។