ក្រុមនិស្សិតរាប់រយនាក់ បានជួបជុំគ្នានៅតាមទីក្រុងសំខាន់ៗរបស់ឥណ្ឌូនេស៊ីនាថ្ងៃចន្ទនេះ ដោយផ្គើនចំពោះក្តីបារម្ភពីការបង្ក្រាបបាតុកម្មយ៉ាងចាស់ដៃពីសមត្ថកិច្ច ក្រោយកុបកម្មស្លាប់មនុស្សកាលពីចុងសប្តាហ៍កន្លងទៅ បណ្តាលឲ្យមនុស្ស ៨នាក់ស្លាប់ នៅក្នុងអំពើហិង្សាដ៏អាក្រក់បំផុតមួយនៅប្រទេសអាស៊ីអាគ្នេហ៍មួយនេះ ក្នុងរយៈពេលជាង ២ទសវត្សរ៍ ។

បាតុកម្មបានចាប់ផ្តើមកាលពីរយៈពេល ១សប្តាហ៍មុន ប្រឆាំងនឹងអាទិភាពចំណាយរបស់រដ្ឋាភិបាល ដូចជាអត្ថប្រយោជន៍ច្រើនហួសហេតុសម្រាប់ក្រុមតំណាងរាស្រ្ត ហើយនិងធ្វើឲ្យកើតមានការចូលលួចតាមផ្ទះរបស់សមាជិកគណបក្សនយោបាយមួយចំនួន ក្រោយរថយន្តនគរបាលបានបើកបុកស្លាប់អ្នករត់ម៉ូតូឌប់ម្នាក់ ។

កាលពីថ្ងៃអាទិត្យកន្លងទៅ ប្រធានាធិបតីឥណ្ឌូនេស៊ីលោក Prabowo Subianto បានប្រកាសកាត់បន្ថយអត្ថប្រយោជន៍ក្រុមតំណាងរាស្រ្ត ដែលជាសម្បទានដ៏ធំមួយដល់ក្រុមបាតុករ ប៉ុន្តែលោក ព្រមានថា កងកម្លាំងសន្តិសុខនឹងប្រើប្រាស់កម្លាំ ងដើម្បីគ្រប់គ្រងច្បាប់សណ្តាប់ធ្លាប់ ។

វត្តមានដ៏ច្រើនរបស់កងកម្លាំងសន្តិសុខដឹកនាំដោយយោធា បាននាំឲ្យក្រុមអ្នករៀបចំបាតុកម្មមួយចំនួន ផ្អាកការជួបជុំគ្នារបស់ពួកគេនៅទីក្រុងហ្សាកាតា ។

ទោះបីជាយ៉ាងណាក៏ដោយ ក្រុមនិស្សិតមួយចំនួន បានជួបជុំគ្នានៅទីក្រុងហ្សាកាតា ក៏ដូចជាទីក្រុងវប្បធម៌ Yogyakarta និងទីក្រុង Makassar ជាទីដែលកើតមានអំពើហិង្សាដ៏អាក្រក់បំផុតកាលពីចុងសប្តាហ៍កន្លងទៅ ៕