គេហទំព័រយោធាអ៊ុយក្រែន បានរាយការណ៍នៅថ្ងៃចន្ទ (១ កញ្ញា) ថា មូលដ្ឋានយោធារុស្ស៊ី មួយកន្លែងនៅតំបន់កាន់កាប់ គ្រីម៉េ ត្រូវវាយប្រហារដោយមីស៊ីលតម្រង់គោលដៅ Flamingo ទើបបង្កើតថ្មីរបស់អ៊ុយក្រែន ដែលទំនងជាបានសម្លាប់ប្រតិបត្តិករវិមានក្រឹមឡាំងម្នាក់ និងបំផ្លាញយន្តហោះចម្បាំង Hovercraft របស់រុស្ស៊ី ៦គ្រឿង។

ទីក្រុងគីវ មិនបានបញ្ជាក់ជាផ្លូវការលើការប្រើប្រាស់អាវុធថ្មីនេះទេ ប៉ុន្តែប្រសិនបើរបាយការណ៍ជាការពិត នោះនឹងតំណាងឱ្យលើកដំបូងបំផុតដែលមីស៊ីល Flamingo ដ៏មានឥទ្ធិពល និងផលិតក្នុងស្រុក ត្រូវបានប្រើប្រាស់ដោយទីក្រុងគីវ ក្នុងសមរភូមិប្រឆាំងនឹងរុស្ស៊ី អំឡុងពេលជម្លោះជាង ៣ឆ្នាំមកនេះ។

គេហទំព័រព័ត៌មានការពារជាតិ Militarnyi របស់អ៊ុយក្រែន រាយការណ៍ថា យ៉ាងហោចណាស់មានមីស៊ីល ៣គ្រាប់ ដែលទំនងជាបាញ់ចេញពីតំបន់កំពង់ផែ អូដេសា ភាគខាងត្បូងអ៊ុយក្រែន បានវាយប្រហារទីតាំងដែលប្រតិបត្តិការដោយទីភ្នាក់ងារសន្តិសុខរុស្ស៊ី ជិតទីប្រជុំជន Armyansk នៃតំបន់គ្រីម៉េ កាលពីថ្ងៃសៅរ៍ ៣០ សីហា។

អ៊ុយក្រែន បានបើកបង្ហាញមីស៊ីល Flamingo នេះកាលពីខែមុន ដោយចាត់ទុកអាវុធនេះថាជា "មីស៊ីលជោគជ័យបំផុត" របស់ទីក្រុងគីវ និងជាយុទ្ធោបករណ៍ "ដ៏ខ្លាំងក្លា" ក្នុងឃ្លាំងអាវុធរបស់ប្រទេស។ មីស៊ីលតម្រង់គោលដៅប្រភេទនេះត្រូវបានអ្នកជំនាញគិតថា មានរយៈចម្ងាយប្រហែល ៣.០០០គីឡូម៉ែត្រ។

សព្វាវុធផលិតដោយលោកខាងលិចដែលផ្តល់ឱ្យទីក្រុងគីវ ជារឿយៗត្រូវទទួលរងការរឹតបន្តឹងមិនឱ្យវាយលុកចូលជ្រៅទៅក្នុងទឹកដីរុស្ស៊ីឡើយដោយសារការភ័យខ្លាចពីការរីករាយដាលនៃសង្គ្រាម ប៉ុន្តែមីស៊ីលផលិតក្នុងស្រុករបស់អ៊ុយក្រែន មិនមានដែនកំណត់ទាំងនេះទេ៕