មន្ត្រីក្រសួងថាមពលស៊ីរីបានប្រាប់សារព័ត៌មាន Reuters ថា ប្រទេសស៊ីរី បាននាំចេញប្រេងឆៅចំនួន៦០០.០០០បារ៉ែលកាលពីថ្ងៃចន្ទ ទី១ ខែកញ្ញា ពីកំពង់ផែ Tartus ជាផ្នែកមួយនៃកិច្ចព្រមព្រៀងជាមួយក្រុមហ៊ុនពាណិជ្ជកម្ម ជាការនាំចេញប្រេងរបស់ប្រទេសស៊ីរីជាផ្លូវការលើកដំបូងក្នុងរយៈពេល១៤ឆ្នាំមកនេះ។

ប្រទេសស៊ីរី បាននាំចេញប្រេង៣៨០.០០០បារ៉ែលក្នុងមួយថ្ងៃក្នុងឆ្នាំ២០១០ មួយឆ្នាំមុនការតវ៉ាប្រឆាំងការគ្រប់គ្រងរបស់លោក Bashar al-Assad ដោយបានឈានចូលទៅក្នុងសង្រ្គាមជិត១៤ឆ្នាំ ដែលបានបំផ្លិចបំផ្លាញសេដ្ឋកិច្ច និងហេដ្ឋារចនាសម្ព័ន្ធរបស់ប្រទេស រួមទាំងការផលិតប្រេងឆៅផងដែរ។

លោក Assad ត្រូវបានផ្តួលរំលំកាលពីខែធ្នូឆ្នាំមុន ហើយរដ្ឋាភិបាលដឹកនាំដោយក្រុមអ៊ីស្លាមនិយមដែលចូលជំនួសលោកAssad បានសន្យាថានឹងធ្វើឱ្យសេដ្ឋកិច្ចរបស់ប្រទេសស៊ីរី ស្ទុះងើបឡើងវិញ។ លោក Riyad al-Joubasi ជំនួយការនាយកផ្នែកប្រេងនិងឧស្ម័ននៅក្រសួងថាមពលរបស់ប្រទេសស៊ីរី បាននិយាយថាប្រេងឆៅត្រូវបានលក់ទៅឱ្យ ក្រុមហ៊ុន B Serve Energy ។

B Serve មានទំនាក់ទំនងជាមួយក្រុមហ៊ុន BB Energy ជាក្រុមហ៊ុនពាណិជ្ជកម្មប្រេងពិភពលោក។ BB Energy មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ។ ក្រសួងថាមពលរបស់ប្រទេសស៊ីរី បាននិយាយនៅក្នុងសេចក្តីថ្លែងការណ៍ថា ប្រេងត្រូវបាននាំចេញតាមនាវាដឹកប្រេង Nissos Christiana ។

អណ្តូងប្រេងស៊ីរីភាគច្រើនស្ថិតនៅភាគឦសានក្នុងទឹកដីដែលកាន់កាប់ដោយអាជ្ញាធរដឹកនាំដោយក្រុមឃឺដ។ វិស័យប្រេងបានផ្លាស់ប្តូរជាច្រើនដងក្នុងអំឡុងសង្គ្រាមស៊ីរី ហើយទណ្ឌកម្មរបស់សហរដ្ឋអាមេរិក និងអឺរ៉ុប បានធ្វើឱ្យស្មុគស្មាញទាំងការនាំចេញ និងការនាំចូលស្របច្បាប់។