ក្រសួងការបរទេសអេហ្ស៊ីបកាលពីថ្ងៃចន្ទ បានថ្កោលទោសការវាយលុករបស់យោធាអ៊ីស្រាអែល ដែលកំពុងបន្តនៅតំបន់ហ្កាហ្សាថា ជាការរំលោភយ៉ាងខ្ជាប់ខ្ជួនចំពោះច្បាប់មនុស្សធម៌អន្តរជាតិ។

ក្រសួងបាននិយាយនៅក្នុងសេចក្តីថ្លែងការណ៍មួយថា «ការពង្រីកយោធា»របស់អ៊ីស្រាអែលផ្ទុយនឹងកិច្ចខិតខំប្រឹងប្រែងសម្រុះសម្រួលជាសាកល រួមទាំងកិច្ចខិតខំប្រឹងប្រែងរួមគ្នារបស់អេហ្ស៊ីប និងកាតា ដើម្បីបញ្ឈប់សង្គ្រាម តាមរយៈសំណើបទឈប់បាញ់ថ្មី និងឆ្លុះបញ្ចាំងពីអវត្តមានទាំងស្រុងនៃឆន្ទៈរបស់អ៊ីស្រាអែល ក្នុងការបញ្ចប់សង្រ្គាមនៅតំបន់ហ្កាហ្សា បន្ថយភាពតានតឹងក្នុងតំបន់ និងស្តារភាពស្ងប់ស្ងាត់ និងសន្តិភាពឡើងវិញ។

ក្រសួងបាននិយាយថា អ៊ីស្រាអែលដកខ្លួនចេញពីដំណើរការសន្តិភាពដោយផ្អែកលើដំណោះស្រាយរដ្ឋពីរ ដែលត្រូវបានគាំទ្រដោយសហគមន៍អន្តរជាតិ ដោយបន្ថែមថា គោលនយោបាយបង្អត់អាហារ និងការឡោមព័ទ្ធរបស់អ៊ីស្រាអែលប្រឆាំងនឹងជនស៊ីវិលដែលគ្មានទីពឹងនៅតំបន់ហ្កាហ្សា គំរាមកំហែងដល់ការកើនឡើងនូវផលវិបាកមនុស្សធម៌ដ៏មហន្តរាយ នៅក្នុងតំបន់នេះ។

កាលពីថ្ងៃទី ០៨ ខែសីហា អ៊ីស្រាអែលបានប្រកាសថា គណៈរដ្ឋមន្ត្រីសន្តិសុខរបស់ខ្លួន បានអនុម័តផែនការមួយ ដើម្បីកាន់កាប់ទីក្រុងហ្កាហ្សា ដែលនាំឲ្យមានការថ្កោលទោសភ្លាមៗទាំងក្នុងនិងក្រៅប្រទេស។

កាលពីថ្ងៃសុក្រ យោធាអ៊ីស្រាអែលបា ននិយាយថា ខ្លួនបានចាប់ផ្តើមប្រតិបត្តិការបឋម និងដំណាក់កាលដំបូងនៃការវាយប្រហារលើទីក្រុងហ្កាហ្សា ហើយនិងកំពុងប្រតិបត្តិការយ៉ាងខ្លាំងក្លា នៅជាយក្រុងហ្កាហ្សា៕