ប្រធានាធិបតីអ៊ីស្រាអែល លោក Isaac Herzog នឹងធ្វើដំណើរទៅកាន់បុរីវ៉ាទីកង់ នាថ្ងៃទី៤ ខែកញ្ញា ដើម្បីចូលជួបសម្ដែងការគួរសម និងជជែកជាមួយសម្តេច ប៉ាប ឡេអូ (Pope Leo) ដែលថ្មីៗនេះ បានបង្កើនការអំពាវនាវរបស់ព្រះអង្គឲ្យបញ្ចប់សង្រ្គាម នៅតំបន់ហ្កាហ្សា។

នៅក្នុងសេចក្តីថ្លែងការណ៍មួយ នាថ្ងៃអង្គារ (ទី២ ខែកញ្ញា) នេះ ការិយាល័យរបស់លោក Herzog បានឲ្យដឹងថា ដំណើរទស្សនកិច្ចរយៈពេល ១ថ្ងៃនេះ គឺធ្វើឡើងតាមការអញ្ជើញរបស់សម្តេច ប៉ាប។ សេចក្ដីថ្លែងការណ៍ បានបន្ថែមថា លោកប្រធានាធិបតីក៏នឹងជួបជាមួយរដ្ឋលេខាធិការ Pietro Parolin ដែលជាប្រមុខអ្នកការទូតរបស់បុរីវ៉ាទីកង់ ហើយទស្សនាបណ្ណសារ និងបណ្ណាល័យរបស់បុរីវ៉ាទីកង់ផងដែរ។

ការិយាល័យប្រធានាធិបតីបានឲ្យដឹងថា៖ «ចំណុចសំខាន់នៃកិច្ចប្រជុំរបស់ថ្នាក់ដឹកនាំទាំង២ នឹងជាកិច្ចប្រឹងប្រែង ដើម្បីធានាឲ្យមានការដោះលែងចំណាប់ថ្នូរ ការប្រយុទ្ធប្រឆាំងនឹងសកម្មភាពប្រឆាំងជនជាតិជ្វីហ្វសកល និងការការពារសហគមន៍គ្រិស្តសាសនា នៅតំបន់មជ្ឈិមបូព៌ា រួមជាមួយនឹងការពិភាក្សាលើបញ្ហានយោបាយផ្សេងទៀត»។

គួរបញ្ជាក់ថា សម្ដេចសង្ឃកាតូលិក Leo ដែលជាសម្តេច ប៉ាប ជនជាតិអាមេរិកទី១ កាលពីសប្តាហ៍មុន បានចេញនូវ «ការអំពាវនាវដ៏ខ្លាំងក្លា» ឲ្យបញ្ចប់ជម្លោះជិត ២ឆ្នាំ រវាងអ៊ីស្រាអែល និងក្រុមហាម៉ាស ដោយអំពាវនាវឲ្យមានបទឈប់បាញ់អចិន្ត្រៃយ៍ ការដោះលែងចំណាប់ថ្នូរដែលត្រូវបានឃុំខ្លួននៅតំបន់ហ្កាហ្សា និងការផ្តល់ជំនួយមនុស្សធម៌៕