មនុស្សយ៉ាងហោចណាស់១១នាក់បានស្លាប់ជាអ្វីដែលមន្ត្រីនគរបាលសង្ស័យថាជាការបំផ្ទុះគ្រាប់បែកអត្តឃាតដាក់គោលដៅលើការជួបជុំនយោបាយនៅភាគនិរតីទីក្រុង Quetta ប្រទេសប៉ាគីស្ថាន។

មន្ត្រីរដ្ឋាភិបាល លោក Hamza Shafaat បានប្រាប់ទីភ្នាក់ងារសារព័ត៌មានរ៉យទ័រកាលពីថ្ងៃអង្គារថា « គ្រាប់បែកបានផ្ទុះនៅទីតាំងចតរថយន្ត ខណៈមនុស្សជាច្រើនកំពុងចាកចេញពីការជួបជុំ» ដែលក្នុងហេតុការណ៍នេះមនុស្ស១១នាក់បានស្លាប់ និង៣០នាក់ផ្សេងទៀតបានរងរបួស។

លោក Sajid Tareen មេដឹកនាំជាន់ខ្ពស់គណបក្ស Balochistan National Party-Mengal (BNP-M) ក៏បានបញ្ជាក់ផងដែរថា ការផ្ទុះបានកើតឡើងនៅក្នុងចំណតរថយន្តបន្ទាប់ពីការជួបជុំគ្នាបានបញ្ចប់ ហើយសមាជិកបក្សជាច្រើននាក់បានរងរបួស។ នៅពុំទាន់មានក្រុមណាមួយចេញមុខអះអាងទទួលខុសត្រូវចំពោះការបំផ្ទុះនេះនៅឡើយទេ។

ក្រុង Quetta ជាទីរួមខេត្ត Balochistan មានព្រំប្រទល់ជាប់ប្រទេសអាហ្វហ្គានីស្ថាននិងអ៊ីរ៉ង់។ អ្នកប្រយុទ្ធផ្តាច់ខ្លួនBaloch តែងតែធ្វើប្រតិបត្តិការនៅក្នុងតំបន់ និងបានអះអាងការវាយប្រហារនាពេលកន្លងមក។