ការវាយលុករបស់យោធាអ៊ីស្រាអែលទៅលើទីក្រុងហ្កាហ្សានៅតែបន្តឥតឈប់ឈរ ដែលបានបណ្តាលឱ្យពលរដ្ឋប៉ាឡេស្ទីនជាង៥០នាក់ស្លាប់រួមមានទាំងអ្នកស្វែងរកជំនួយ ខណៈព្យាយាមដណ្តើមយកការគ្រប់គ្រងមជ្ឈមណ្ឌលទីក្រុងដ៏ធំបំផុតនៅតំបន់ហ៊ុមព័ទ្ធដែលមានប្រជាជនប្រហែល១លាននាក់។

យ៉ាងហោចណាស់ពលរដ្ឋប៉ាឡេស្ទីន១០៥នាក់ត្រូវបានសម្លាប់នៅទូទាំងតំបន់ហ្កាហ្សាកាលពីថ្ងៃអង្គារ ខណៈការវាយប្រហាររបស់អ៊ីស្រាអែលបានបំផ្លាញតំបន់មានប្រជាជនរស់នៅច្រើន ជាពិសេសសង្កាត់ al-Sabra ដែលរងការវាយប្រហារជាច្រើនថ្ងៃមកហើយ។ យ៉ាងហោចមនុស្ស៣២នាក់ក្នុងចំណោមអ្នកទាំងនេះត្រូវបានសម្លាប់ ខណៈកំពុងស្វែងរកជំនួយ។

ការវាយប្រហារកាន់តែខ្លាំងខណៈនាយករដ្ឋមន្ត្រី លោក Benjamin Netanyahu បាននិយាយថា អ៊ីស្រាអែលកំពុងប្រឈមនឹង«ដំណាក់កាលសម្រេចចិត្ត»នៃសង្គ្រាមក្នុងពេលដែលខ្លួនត្រៀមដើម្បីដណ្តើមយកទីក្រុងហ្កាហ្សា ទោះបីជាមានការថ្កោលទោសជាសកលក៏ដោយ។

អ្នកស្រី Hind Khoudary អ្នកសារព័ត៌មាន Al Jazeera បាននិយាយថា «ពលរដ្ឋប៉ាឡេស្ទីនស្ថិតនៅក្នុងតំបន់ហ៊ុមព័ទ្ធក្នុងទីក្រុងហ្កាហ្សានៅពេលនេះ ដោយព្យាយាមរស់រានពីការវាយប្រហារតាមអាកាស»។

អ្នកស្រីនិយាយថា «ពលរដ្ឋកំពុងស្លាប់ដោយសារការអត់អាហារ ហើយផ្លូវដឹកជញ្ជូនជំនួយត្រូវបានបិទខណៈពលរដ្ឋមិនអាចទទួលបានមធ្យោបាយផ្គត់ផ្គង់ជាមូលដ្ឋាន»។