នគរបាលនិយាយថា បុគ្គលិកសន្តិសុខ៦នាក់ និងសកម្មប្រយុទ្ធ៦នាក់បានស្លាប់កាលពីថ្ងៃអង្គារ ទី២ ខែកញ្ញា ក្នុងអំឡុងពេលការវាយប្រហារនៅក្នុងមូលដ្ឋានកងកម្លាំងយោធានៅភាគពាយព្យប្រទេសប៉ាគីស្ថាន ដោយបានចាប់ផ្តើមដោយអ្នកបំផ្ទុះគ្រាប់បែកអត្តឃាតបានសម្រុកចូលទៅក្នុងបរិវេណនោះហើយនាំឱ្យមានការប្រយុទ្ធគ្នាដោយកាំភ្លើងរយៈពេល១២ម៉ោង។

លោក Sajjad Khan អធិការនគរបាលប្រចាំតំបន់បាននិយាយថា អ្នកបំផ្ទុះគ្រាប់បែកអត្តឃាតបានបើករថយន្តផ្ទុកគ្រឿងផ្ទុះបុកចូលមូលដ្ឋានក្នុងទីក្រុង Bannu កាលពីថ្ងៃអង្គារ បណ្តាលផ្ទុះដែលអាចឱ្យអ្នកវាយប្រហារផ្សេងទៀតចូលទៅក្នុងបរិវេណនោះបាន។

អធិការនគរបាលនិយាយថា ការវាយប្រហារនេះ បានបណ្តាលឱ្យបុគ្គលិកសន្តិសុខ១៦នាក់និងជនស៊ីវិល៣នាក់រងរបួស ហើយកងកម្លាំងរបស់យើងបានប្រយុទ្ធដោយកាំភ្លើងយ៉ាងក្លាហានរយៈពេលប្រហែល១២ម៉ោង។ ក្រុង Bannu មានទីតាំងនៅជិតតំបន់ព្រំដែនគ្មានច្បាប់ជាមួយប្រទេសជិតខាងអាហ្វហ្គានីស្ថាន ជាទីតាំងលាក់ខ្លួនរបស់ក្រុមសកម្មប្រយុទ្ធអ៊ីស្លាមនិយមជាយូរមកហើយ។

រហូតមកដល់ពេលនេះ នៅមិនទាន់មានក្រុមណាមួយចេញមុខអះអាងទទួលខុសត្រូវនៅឡើយទេ។ សេចក្តីថ្លែងការណ៍របស់នគរបាលបានដាក់កំហុសការវាយប្រហារទៅលើក្រុមសកម្មប្រយុទ្ធអ៊ីស្លាម ប៉ុន្តែមិនបានបញ្ចេញឈ្មោះក្រុមណាមួយឡើយ។ ក្រុម Tehreek-e-Taliban Pakistan (TTP) ឬប៉ាគីស្ថានតាលីបង់ដែលជាឆ័ត្រនៃអង្គការអ៊ីស្លាមនិយមនិកាយស៊ុននី គឺជាក្រុមសំខាន់ដែលតែងធ្វើប្រតិបត្តិការនៅតំបន់ព្រំដែន។