ប្រជាជនម៉ាឡេស៊ីរាប់សិបនាក់ បានមកប្រមូលផ្តុំគ្នានៅខាងក្រៅស្ថានទូតឥណ្ឌូនេស៊ីនៅទីក្រុង Kuala Lumpur កាលពីយប់ថ្ងៃអង្គារ ទី២ ខែកញ្ញា ដើម្បីបង្ហាញពីសាមគ្គីភាពជាមួយប្រជាជនឥណ្ឌូនេស៊ីដែលកំពុងតវ៉ាប្រឆាំងនឹងរដ្ឋាភិបាលរបស់ពួកគេ។

ការតវ៉ា បានចាប់ផ្តើមនៅទីក្រុងហ្សាកាតា ប្រទេសឥណ្ឌូនេស៊ីជុំវិញការចំណាយរបស់រដ្ឋាភិបាល រួមទាំងការបង្កើនអត្ថប្រយោជន៍សម្រាប់សមាជិកសភា ហើយចាប់តាំងពីពេលនោះមកការតវ៉ាបានរាលដាលនៅទូទាំងប្រទេស។ ក្រុមអ្នកតវ៉ាបានធ្វើឲ្យផ្ទុះកាន់តែធំទៅជាកុបកម្មនិងចោរកម្ម បន្ទាប់ពីរថយន្តរបស់នគរបាលបានបើកបុកអ្នកជិះម៉ូតូម្នាក់ ដោយការតវ៉ានេះបណ្តាលឲ្យខូចខាតប្រាក់រាប់លានដុល្លារនៅក្នុងរដ្ឋធានី។

លោក Wong Ku Kui អ្នកចូលរួមការតវ៉ានៅក្នុងប្រទេសម៉ាឡេស៊ីបាននិយាយថា «នគរបាលគួរតែការពារប្រជាជន ហើយមិនត្រូវប្រែក្លាយទៅជាឧបករណ៍របស់រដ្ឋាភិបាលដើម្បីគាបសង្កត់ពលរដ្ឋរបស់ខ្លួននោះទេ» ដោយបានចាត់ទុកភាពជាអ្នកដឹកនាំរបស់លោក Prabowo Subianto ថាក្បត់លទ្ធិប្រជាធិបតេយ្យ និងសិទ្ធិមនុស្ស ។

លោក Alyaah Hani ដែលបានចូលរួមក្នុងការប្រមូលផ្តុំសាមគ្គីជាមួយមិត្តភក្តិបាននិយាយថា «និស្សិតសាកលវិទ្យាល័យម៉ាឡេស៊ីកំពុងតាមដានយ៉ាងដិតដល់នូវរាល់ចំណាត់ការ និងរាល់ការរំលោភសិទ្ធិមនុស្សដែលប្រព្រឹត្តប្រឆាំងនឹងនិស្សិត និងពលរដ្ឋឥណ្ឌូនេស៊ី ដូច្នេះយើងនឹងមិននៅស្ងៀមទេ»។