ចៅក្រមនៅទីក្រុងវ៉ាស៊ីនតោនបានចេញសេចក្តីសម្រេចកាលពីថ្ងៃអង្គារ ទី២ ខែកញ្ញាថា ក្រុមហ៊ុន Google របស់ក្រុមហ៊ុនមេ Alphabet ត្រូវតែចែករំលែកទិន្នន័យជាមួយដៃគូប្រជែង ដើម្បីបើកការប្រកួតប្រជែងក្នុងកម្មវិធីស្វែងរកតាមអ៊ីនធឺណិត។

នាយកប្រតិបត្តិក្រុមហ៊ុន Google លោក Sundar Pichai បានបង្ហាញការព្រួយបារម្ភនៅក្នុងការជម្រះក្តីក្នុងសំណុំរឿងនេះកាលពីខែមេសា ដែលថាវិធានការចែករំលែកទិន្នន័យដែលស្វែងរកដោយក្រសួងយុត្តិធម៌សហរដ្ឋអាមេរិក អាចធ្វើឱ្យគូប្រជែងរបស់ក្រុមហ៊ុន Google ត្រួតពិនិត្យបច្ចេកវិទ្យារបស់ខ្លួន។ ក្រុមហ៊ុន Google បាននិយាយកាលពីពេលមុនថា ក្រុមហ៊ុនគ្រោងនឹងដាក់បណ្តឹងឧទ្ធរណ៍ ដែលមានន័យថា វាអាចចំណាយពេលច្រើនឆ្នាំមុនពេលក្រុមហ៊ុនត្រូវបានតម្រូវឱ្យចាត់វិធានការតាមសេចក្តីសម្រេចរបស់ចៅក្រមតំបន់សហរដ្ឋអាមេរិក លោក Amit Mehta ។

សេចក្តីសម្រេចនេះចេញមកពីការតតាំងខាងផ្លូវច្បាប់រយៈពេលប្រាំឆ្នាំ រវាងក្រុមហ៊ុនដែលរកបានប្រាក់ចំណេញបានច្រើនបំផុតរបស់ពិភពលោក និងប្រទេសដើមរបស់ខ្លួនគឺសហរដ្ឋអាមេរិក ដែលលោក Mehta បានចេញសេចក្តីសម្រេចកាលពីឆ្នាំមុនថា ក្រុមហ៊ុនកាន់កាប់ផ្តាច់មុខដោយខុសច្បាប់ក្នុងកម្មវិធីស្វែងរកតាមអ៊ីនធឺណិត និងការផ្សាយពាណិជ្ជកម្មដែលពាក់ព័ន្ធ។

បន្ថែមពីលើករណីជុំវិញកម្មវិធីស្វែងរក ក្រុមហ៊ុនGoogleកំពុងតែជាប់ពាក់ព័ន្ធក្នុងបណ្តឹងជុំវិញភាពលេចធ្លោរបស់ខ្លួននៅក្នុងទីផ្សារផ្សេងៗទៀត។ កាលពីពេលថ្មីៗនេះក្រុមហ៊ុនបាននិយាយថា ខ្លួននឹងបន្តប្រឆាំងនឹងសេចក្តីសម្រេចដែលតម្រូវឱ្យខ្លួនកែប្រែកម្មវិធី app store របស់ខ្លួនឡើងវិញនៅក្នុងបណ្តឹងដែលឈ្នះដោយក្រុមហ៊ុន «Fortnite» Epic Games ។