ប្រធានាធិបតីអាមេរិក លោក Donald Trump និយាយថា លោកមិនបានពិចារណាដល់ការទម្លាក់អាត្រាពន្ធលើប្រទេសឥណ្ឌានោះឡើយ ដោយការលើកឡើងនេះកើតមានមួយសប្តាហ៍បន្ទាប់ពីសហរដ្ឋអាមេរិកបានដំឡើងពន្ធទ្វេដងលើការនាំចូលរបស់ប្រទេសនេះដល់ ៥០ភាគរយដែលជាការដាក់ទណ្ឌកម្ម ចំពោះការនាំចូលប្រេងពីរុស្ស៊ី។

លោក Trump បានឆ្លើយតបថា «ទេ» នៅពេលត្រូវបានអ្នកសារព័ត៌មានសួរថា តើលោកកំពុងពិចារណាដកអត្រាពន្ធខ្លះដែលដាក់លើប្រទេសឥណ្ឌាដែរ ឬទេ។

ក្នុងព្រឹត្តិការណ៍មួយ នៅឯសេតវិមាន កាលពីថ្ងៃអង្គារ (ទី២ ខែកញ្ញា) លោកបាននិយាយថា៖ «យើងចុះសម្រុងជាមួយឥណ្ឌាបានយ៉ាងល្អ» ប៉ុន្តែបានរិះគន់អ្វីដែលលោកបានប្រាប់ថា ជាទំនាក់ទំនងពាណិជ្ជកម្មអតុល្យភាពជាមួយទីក្រុងញូវដេលី ដោយសារតែការយកពន្ធខ្ពស់របស់ឥណ្ឌា។

ប្រធានាធិបតីអាមេរិករូបនេះបានបញ្ជាក់ថា៖ «អ្នកត្រូវដឹងថា ឥណ្ឌាមានរយៈពេលជាច្រើនឆ្នាំមកហើយ។ វាគឺជាទំនាក់ទំនងលម្អៀងតែម្ខាង។ ឥណ្ឌាកំពុងគិតពន្ធយ៉ាងខ្ពស់ខ្លាំងលើយើង ដែលជាអត្រាខ្ពស់បំផុតក្នុងពិភពលោក»។

ការដំឡើងពន្ធរបស់សហរដ្ឋអាមេរិកលើឥណ្ឌាបានកើតឡើង បើទោះបីជាមានការចរចាជាច្រើនខែ រវាងទីក្រុងញូវដេលី និងទីក្រុងវ៉ាស៊ីនតោនក៏ដោយ ហើយធ្វើឲ្យមន្ត្រីនៅក្នុងប្រទេសឥណ្ឌា មានការស្រឡាំងកាំង។ ពន្ធគយខ្ពស់ និងគោលនយោបាយគាំពារនិយមរបស់ឥណ្ឌា បានធ្វើឲ្យអ្នកចរចាពាណិជ្ជកម្មអាមេរិកមានកំហឹង៕