ក្រុមអ្នកប្រឆាំងលោកនាយករដ្ឋមន្ត្រី Shigeru Ishiba នៅក្នុងគណបក្សកាន់អំណាចរបស់ប្រទេសជប៉ុន នៅថ្ងៃពុធ (ទី៣ ខែកញ្ញា) នេះ ដើម្បីប្រមែប្រមូលការគាំទ្រ ដើម្បីឲ្យមានការបោះឆ្នោតជ្រើសរើសអ្នកដឹកនាំថ្មី ដោយឥស្សរជនដ៏មានឥទ្ធិភលជាច្រើននៅក្នុងបក្សត្រូវបានគេរាយការណ៍ថា បានប្រែទៅជារិះគន់លើនាយករដ្ឋមន្ត្រីដែលកំពុងជួបការលំបាករូបនេះ។

នៅឆ្នាំ២០២៤ លោក Ishiba វ័យ ៦៨ឆ្នាំ បានឡើងដឹកនាំគណបក្សប្រជាធិបតេយ្យសេរីនិយម (LDP) ដែលមានឥទ្ធិពលយ៉ាងយូរអង្វែង ហើយចាប់តាំងពីពេលនោះមក បានបាត់បង់សំឡេងភាគច្រើន នៅក្នុងសភាទាំង២ ដោយថ្មីៗនេះនៅក្នុងការបោះឆ្នោតសភាជាន់ខ្ពស់ កាលពីខែកក្កដា។

កាលពីថ្ងៃអង្គារ (ទី២ ខែកញ្ញា) ឥស្សរជនជាន់ខ្ពស់របស់គណបក្ស LDP ៤រូប ក្នុងនោះមានរួមទាំងអគ្គលេខាធិការបក្ស លោក Hiroshi Moriyama ផងដែរ បានស្នើសុំលាលែងពីតំណែង ប៉ុន្តែលោក Ishiba បាននិយាយថា លោកនៅមានការងារត្រូវធ្វើ ក្នុងនាមជាមេដឹកនាំ។

លោកបាននិយាយថា៖ «ខ្ញុំនឹងធ្វើការសម្រេចចិត្តយ៉ាងសមស្រប តាមពេលវេលាដ៏សមស្រប។ ប៉ុន្តែដំបូង និងសំខាន់បំផុត ខ្ញុំជឿថា ខ្ញុំត្រូវផ្ដោតលើការលះបង់ដល់ការខិតខំប្រឹងប្រែងទាំងអស់ ដើម្បីបំពេញនូវអ្វីដែលប្រជាជនពិតជាចង់ឲ្យខ្ញុំសម្រេចបាន។

លោកបានបញ្ជាក់ថា៖ «ខ្ញុំនឹងមិនរត់ចេញពីការទទួលខុសត្រូវនោះទេ»។ លោកបានបន្ថែមថា លោកមិនមានចេតនាបន្តមុខតំណែងរបស់លោកនោះឡើយ ប្រសិនបើវាលែងអាចទទួលយកបានហើយនោះ។

គណបក្ស LDP បច្ចុប្បន្ន កំពុងស្ទង់មតិក្នុងចំណោមសមាជិកសភារបស់ខ្លួនចំនួន ២៩៥រូប និងមន្ត្រីថ្នាក់តំបន់ចំនួន ៤៧ នៅទូទាំងប្រទេសជប៉ុន ដើម្បីបានដឹងថា តើត្រូវរៀបចំការប្រកួតជ្រើសរើសអ្នកដឹកនាំថ្មីដែរ ឬយ៉ាងណា ជាដំណើរការដែលនឹងបញ្ចប់នៅថ្ងៃទី៨ ខែកញ្ញា៕