រដ្ឋមន្ត្រីការបរទេសហ្ស៊កដានី លោក Ayman Safadi បានថ្កោលទោសភាពស្ងៀមស្ងាត់របស់ពិភពលោក ចំពោះការវាយលុករបស់អ៊ីស្រាអែល នៅតំបន់ហ្កាហ្សា ដោយនិយាយថា ប្រសិនបើការសម្លាប់ក្នុងកម្រិតដូចគ្នា កំពុងកើតមាននៅកន្លែងផ្សេងទៀតនោះ «ពិភពលោកទាំងមូលនឹងក្រោកឈរឡើង ហើយពោលនូវអ្វីមួយជាមិនខាន»។

លោក Safadi បានលើកឡើងថា៖ «អ្វីដែលបានកើតឡើង គឺថា ប្រព័ន្ធអន្តរជាតិរបស់យើងបានធ្វើឲ្យទៅជារឿងធម្មតា សម្រាប់ការសម្លាប់មនុស្សស្លូតត្រង់ ភាពអត់ឃ្លានរបស់មនុស្សស្លូតត្រង់ រហូតដល់កម្រិតមនុស្សត្រូវបានសម្លាប់ជិត ១៥០នាក់ ក្នុងរយៈពេល ២៤ម៉ោង ក៏មិនបង្កឲ្យមានសំឡេងចេញពីកន្លែងណាទាំងអស់»។

ថ្លែងនៅឯវេទិកាយុទ្ធសាស្ត្រ Bled ក្នុងប្រទេសស្លូវេនី កាលពីថ្ងៃអង្គារ (ទី២ ខែកញ្ញា) លោកបានចោទជាសំណួរថា៖ «តើមានអ្នកណាម្នាក់នៅក្នុងបន្ទប់នេះ ដឹងថា មានជនជាតិប៉ាឡេស្ទីនប៉ុន្មាននាក់ ត្រូវបានសម្លាប់ដោយអ៊ីស្រាអែល នៅតំបន់ហ្កាហ្សា កាលពីម្សិលមិញទេ?»។

លោកបានបន្តថា អ៊ីស្រាអែលបានសម្លាប់ជនជាតិប៉ាឡេស្ទីន ៩៨នាក់ នៅតំបន់ហ្កាហ្សា ក្នុងរយៈពេល ៤៨ម៉ោងចុងក្រោយនេះ ក្នុងនោះមានអ្នកស្វែងរកជំនួយ និង ៩នាក់ដែលស្លាប់ដោយការអត់ឃ្លាន។

លោក Safadi បានថ្កោលទោសភាពស្ងៀមស្ងាត់របស់ពិភពលោក ចំពោះការស្លាប់ជនជាតិប៉ាឡេស្ទីន ដោយសារតែការវាយលុកដែលកំពុងបន្តមានរបស់អ៊ីស្រាអែល ដោយគិតត្រឹមសប្តាហ៍នេះ ត្រូវបានចាត់ចូលជាប្រភេទប្រល័យពូជសាសន៍ដោយសមាគមអន្តរជាតិនៃក្រុមអ្នកមានចំណេះដឹង អំពីអំពើប្រល័យពូជសាសន៍ដែលមានសមាជិក ៥០០នាក់៕