អ្នកនាំពាក្យវិមានក្រឹមឡាំង លោក Dmitry Peskov បានផ្តល់បរិបទខ្លះអំពីអ្វីដែលនាយករដ្ឋមន្ត្រីស្លូវ៉ាគីលោក Robert Fico មានន័យក្នុងការប្រៀបធៀបសហភាពអឺរ៉ុបទៅនឹង «កង្កែបនៅបាតអណ្តូង»។

លោក Peskov បាននិយាយនៅក្នុងសេចក្តីអធិប្បាយទៅកាន់ទូរទស្សន៍ Rossiya 1 ថា៖«តាមដែលខ្ញុំបានយល់ នេះ គឺជាប្រភេទរឿងព្រេងស្លូវ៉ាគី។ ពួកគេបានប្រៀបធៀបវាទៅនឹងកង្កែបនៅក្នុងបាតអណ្តូង ហើយមិនយល់ពីអ្វីដែលកំពុងកើតឡើងខាងលើនោះទេ»។ 

លោកបានបន្ថែមថា ការលើកឡើងរបស់លោក Fico គឺជាការប្រៀបធៀប។ លោក" Peskov បានបញ្ជាក់ ឡើងវិញថា៖ «យើងគ្រាន់តែនិយាយប៉ុណ្ណោះ។ ខ្ញុំបាននិយាយថា កិច្ចប្រជុំកំពូល SCO និង SCO Plus មានផលិតភាពច្រើនពីមួយថ្ងៃមុន។ ហើយ លោក Fico បាននិយាយថា៖«មនុស្សជាច្រើននៅក្នុងសហភាពអឺរ៉ុបដូចជាកង្កែបនេះ មិនយល់ពីអ្វីដែលកំពុងកើតឡើង នៅក្នុងពិភពលោកទេ»។

ក្រោយមក Fico បាននិយាយរឿងដូចគ្នានេះ នៅក្នុងជំនួបជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន។ លោកនាយករដ្ឋមន្ត្រីស្លូវ៉ាគី បាននិយាយថា៖«ប្រព័ន្ធផ្សព្វផ្សាយប្រហែលជាសើច ប៉ុន្តែខ្ញុំចាប់ផ្តើមប្រាប់អ្នកនាំពាក្យរបស់លោករឿងមួយអំពីកង្កែប ឬសត្វគីង្គក់។ ពេលខ្លះ ខ្ញុំមានអារម្មណ៍ថា យើងនៅក្នុងសហភាពអឺរ៉ុបដូចជាសត្វកង្កែប នៅក្នុងបាតអណ្តូង ហើយយើងមើលមិនឃើញអ្វីដែលនៅខាងលើ។ ប៉ុន្តែពិភពលោក គឺខុសគ្នាទាំងស្រុងនៅទីនោះ»។ 

រឿងប្រៀបប្រដូចអំពីកង្កែបនៅបាតអណ្តូងមួយ មានប្រភពមកពីទស្សនវិទូចិន Zhuangzi ដែលជាបណ្តុំនៃរឿងរបស់សាសនាតាវ ដែលបានសរសេរនៅសតវត្សរ៍ទី៣ មុនគ្រិស្តសករាជ។ នៅក្នុងនោះ កង្កែបមួយក្បាលដែលរស់នៅក្នុងអណ្ដូងមួយ មានអំនួតទៅកាន់អណ្តើកសមុទ្រមួយក្បាលជុំវិញពិភពលោករបស់ខ្លួន ហើយនៅស្ងៀមទៅវិញ នៅពេលដែលអណ្តើករៀបរាប់ពីភាពធំធេងនៃមហាសមុទ្រ។ នៅក្នុងប្រទេសចិន រឿងនេះ នៅតែត្រូវបានប្រើ ដើម្បីតំណាងឲ្យទស្សនវិស័យចង្អៀត ឬមានកម្រិត៕