ក្រុមឃ្លាំមើលនុយក្លេអ៊ែររបស់អង្គការសហប្រជាជាតិ(UN) បាននិយាយថា ក្រុមសង្កេតការណ៍របស់ខ្លួន បានរកឃើញភាគល្អិតសារធាតុអ៊ុយរ៉ានីញ៉ូមនៅលើទីតាំងមួយកន្លែងស្ថិតក្នុងប្រទេសស៊ីរី ដែលពួកគេសង្ស័យថា ធ្លាប់ត្រូវបានប្រើប្រាស់ក្នុងកម្មវិធីនុយក្លេអ៊ែរសម្ងាត់គ្រប់គ្រងដោយអតីតរដ្ឋាភិបាលរបស់លោក Bashar al-Assad ។

លោក Fredrik Dahl គឺជាអ្នកនាំពាក្យរបស់ទីភ្នាក់ងារថាមពលអាតូមិកអន្តរជាតិ(IAEA) និយាយនៅក្នុងសេចក្តីថ្លែងការណ៍កាលពីថ្ងៃអង្គារថា កាលពីឆ្នាំមុន ក្រុមសង្កេតការរបស់ខ្លួន បានធ្វើដំណើរទៅស្វែងរកសំណាកបរិស្ថាននៅលើទីតាំងសង្ស័យ ៣កន្លែង ស្ថិតនៅតំបន់វាលខ្សាច់ដាច់ស្រយោល Deir el-Zour ។

លោក Dahl បន្តថា ការវិភាគរកឃើញភាគល្អិតអ៊ុយរ៉ានីញ៉ូមនៅក្នុងសំណាកទទួលបានពីទីតាំង ៣កន្លែងនោះ ដែលតាមធម្មតាត្រូវបានប្រើប្រាស់នៅក្នុងម៉ាស៊ីនរ៉េអាក់ទ័រ ។

អគ្គនាយកទីភ្នាក់ងារ IAEAលោក Rafael Grossi រាយការណ៍នូវការរកឃើញទាំងនេះ ដល់គណៈក្រុមប្រឹក្សានាយកទីភ្នាក់ងាររបស់លោកកាលពីថ្ងៃចន្ទ នៅក្នុងរបាយការណ៍មួយស្តីពីការវិវត្តន៍នៅក្នុងប្រទេសស៊ីរី ។

របាយការណ៍នោះ បញ្ជាក់ថា អាជ្ញាធរស៊ីរីបច្ចុប្បន្នចង្អុរបង្ហាញថា ពួកគេពុំមានព័ត៌មានដែលអាចពន្យល់ពីវត្តមាននៃភាគល្អិតសារធាតុអ៊ុយរ៉ានីញ៉ូមទាំងអស់នេះបានឡើយ ។

កាលពីថ្ងៃអង្គារ ទីភ្នាក់ងារ IAEA បានជំរុញឲ្យស៊ីរីចូលរួមសហការណ៍យ៉ាងពេញទំហឹង ជុំវិញការចោទប្រកាន់នេះ ដែលគេអាចនឹងកសាងម៉ាស៊ីនរ៉េអាក់ទ័រសម្ងាត់នៅលើតំបន់វាលខ្សាច់ Deir Az Zor ៕