ក្រុមហាម៉ាស បានអះអាងជាថ្មីកាលពីថ្ងៃពុធ (៣ កញ្ញា) ថា ខ្លួនបានត្រៀមរួចជាស្រេចហើយ សម្រាប់កិច្ចព្រមព្រៀងដ៏ទូលំទូលាយមួយនៅតំបន់ហ្កាហ្សា ដែលតាមរយៈនោះ ចំណាប់ថ្នូរអ៊ីស្រាអែលទាំងអស់ ត្រូវបានដោះលែង ជាថ្នូរនឹងអ្នកទោសប៉ាឡេស្ទីន ក្នុងតួលេខដែលបានព្រមព្រៀងគ្នា។

ការលើកឡើងរបស់ក្រុមនេះ បានធ្វើឡើងភ្លាមៗបន្ទាប់ពីប្រធានាធិបតីសហរដ្ឋអាមេរិក លោក Donald Trump បានបង្ហោះសារលើបណ្ដាញសង្គម ប្រាប់ឱ្យក្រុមហាម៉ាស ដោះលែងចំណាប់ថ្នូរទាំង ២០នាក់មកវិញ។

គួរឱ្យដឹងថា ចំណាប់ថ្នូរនៅហ្កាហ្សា សល់សរុបប្រមាណ ៥០នាក់ទៀត ហើយមន្រ្តីអ៊ីស្រាអែល ប្រកាសថា ក្នុងចំណោមអ្នកសេសសល់នោះ មាន ២៨នាក់បានស្លាប់បាត់ទៅហើយ ខណៈ ២០នាក់ទៀត ត្រូវជឿថានៅរស់ ចំណែកជោគវាសនាមនុស្ស ២នាក់ទៀត នៅមិនទាន់ដឹងច្បាស់នៅឡើយ។

ការិយាល័យរបស់នាយករដ្ឋមន្ត្រីអ៊ីស្រាអែល Benjamin Netanyahu បានរិះគន់ការអត្ថាធិប្បាយរបស់ក្រុមហាម៉ាស នៅក្នុងសេចក្តីថ្លែងការណ៍មួយថា៖ «ជាអកុសល នេះគ្រាន់តែជាកលល្បិចមួយទៀតប៉ុណ្ណោះរបស់ក្រុមហាម៉ាស ដោយមិនមានអ្វីថ្មីឡើយ»។

ការិយាល័យរបស់លោក Netanyahu បានបញ្ជាក់ឡើងវិញថា សង្គ្រាមនៅហ្កាហ្សា នឹងបញ្ចប់បាន លុះត្រាតែចំណាប់ថ្នូរទាំងអស់ត្រូវដោះលែង ក្រុមហាម៉ាសត្រូវដកហូតអាវុធ ដែនដីហ្កាហ្សាគ្មានយោធា អ៊ីស្រាអែលបង្កើតការគ្រប់គ្រងផ្នែកសន្តិសុខលើតំបន់នោះ ហើយរដ្ឋបាលស៊ីវិលថ្មីមួយត្រូវបង្កើតឡើង៕