ប្រធានាធិបតីរុស្ស៊ី លោក Vladimir Putin បាននិយាយថា លោក «មិនដែលបដិសេធ» លទ្ធភាពនៃជំនួបជាមួយសមភាគីអ៊ុយក្រែនលោក Volodymyr Zelenskyy ដើម្បីបញ្ចប់សង្រ្គាមរយៈពេលបីឆ្នាំកន្លះនោះទេ ប៉ុន្តែលោកបាននិយាយបន្ថែមថា ប្រសិនបើគ្មានកិច្ចព្រមព្រៀងសន្តិភាពណាមួយត្រូវបានឈានដល់ទេនោះ ទីក្រុងមូស្គូនឹងសម្រេចគោលដៅយោធារបស់ខ្លួន។

លោកPutin បាននិយាយកាលពីថ្ងៃពុធនៅចុងបញ្ចប់នៃដំណើរទស្សនកិច្ចរបស់លោកទៅកាន់ប្រទេសចិនថា «លោក Donald Trump បានស្នើមកខ្ញុំសម្រាប់ជំនួបបែបនេះ ខ្ញុំបាននិយាយថា «យល់ព្រម វាអាចធ្វើទៅបាន ប៉ុន្តែសុំឱ្យលោកZelenskiy ទៅកាន់ទីក្រុងមូស្គូ» ។ លោក Putin បាននិយាយនៅទីក្រុងប៉េកាំង ខណៈលោកបានអំពាវនាវឲ្យមានការបោះឆ្នោត ដោយចោទសួរពីភាពស្របច្បាប់របស់លោក Zelenskiy។

ប្រធានាធិបតីសហរដ្ឋអាមេរិក លោក Donald Trump ដែលបាននិងកំពុងព្យាយាមសម្របសម្រួលដំណោះស្រាយសន្តិភាព បានអំពាវនាវឱ្យមានជំនួបទល់មុខគ្នារវាងលោក Putin និង លោក Zelenskiy ក្នុងកិច្ចខិតខំប្រឹងប្រែងដើម្បីបញ្ចប់សង្រ្គាម បន្ទាប់ពីបានជួបពិភាក្សាជាមួយមេដឹកនាំរុស្ស៊ីនៅរដ្ឋអាឡាស្កា កាលពីពាក់កណ្តាលខែសីហា។ ប៉ុន្តែរហូតមកដល់ពេលនេះ ពុំទាន់មានវឌ្ឍនភាពលើរឿងនេះនៅឡើយ ដោយអធិការបតីអាល្លឺម៉ង់ លោក Friedrich Merz បានស្នើថា ទីក្រុងហ្សឺណែវ ជាទីកន្លែងដែលអាចធ្វើទៅបាន។