អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានប្រាប់អ្នកយកព័ត៌មាននៅថ្ងៃព្រហស្បតិ៍ (៤ កញ្ញា) នេះថា រុស្ស៊ីមិនមានគម្រោងពិភាក្សាពីលទ្ធភាពនៃការដាក់ពង្រាយយោធាបរទេស នៅក្នុងទឹកដីអ៊ុយក្រែននោះទេ ទោះក្នុងទម្រង់បែបណាក៏ដោយ ដោយហៅវិធានការនេះថា "មិនអាចទទួលយកបានឡើយ"។

នៅក្នុងបទសម្ភាសន៍មួយទៅកាន់កាសែត Financial Times កាលពីថ្ងៃអាទិត្យ ប្រធានគណៈកម្មការអឺរ៉ុប លោកស្រី Ursula von der Leyen បាននិយាយថា អឺរ៉ុបកំពុងរៀបចំ «ផែនការច្បាស់លាស់» សម្រាប់ការដាក់ពង្រាយកងទ័ពចម្រុះជាតិសាសន៍ទៅកាន់អ៊ុយក្រែន ជាផ្នែកមួយនៃការធានាសន្តិសុខក្រោយជម្លោះ ដែលនឹងមានការគាំទ្រពីសមត្ថភាពរបស់សហរដ្ឋអាមេរិក។

លោកស្រី Zakharova បានប្រាប់សន្និសីទសារព័ត៌មានប្រចាំសប្តាហ៍ជាមួយអ្នកយកព័ត៌មានថា "រុស្ស៊ី នឹងមិនពិភាក្សាពីអន្តរាគមន៍ពីបរទេសនៅអ៊ុយក្រែនឡើយ ទោះក្នុងទម្រង់ណាក៏ដោយ ដែលនេះជាមូលដ្ឋានមិនអាចទទួលយកបាននោះទេ ហើយមានតែធ្វើឱ្យខូចដល់សន្តិសុខតែប៉ុណ្ណោះ"។

ប្រធានាធិបតីអ៊ុយក្រែន លោក Volodymyr Zelenskyy និងមេដឹកនាំអឺរ៉ុប កំពុងតែជួបប្រជុំនៅទីក្រុងប៉ារីស នាថ្ងៃព្រហស្បតិ៍នេះ ដើម្បីបញ្ជាក់លម្អិតពីការធានាសន្តិសុខក្រោយជម្លោះសម្រាប់ទីក្រុងគីវ។ កាលពីថ្ងៃពុធ ប្រធានាធិបតីបារាំង លោក Emmanuel Macron និយាយថា សេចក្តីលម្អិតនៃការធានាសន្តិសុខសម្រាប់អ៊ុយក្រែន បានធ្វើឡើងរួចរាល់ហើយ ប៉ុន្តែនៅតែរក្សាជាការសម្ងាត់នៅឡើយ៕