ប្រធានាធិបតីប៉ូឡូញលោក Karol Nawrocki បានប្រាប់អ្នកយកព័ត៌មាន បន្ទាប់ពីកិច្ចពិភាក្សាជាមួយមេដឹកនាំអាមេរិកលោក ដូណាល់ ត្រាំ (Donald Trump) សហរដ្ឋអាមេរិក បានត្រៀមខ្លួនរួចជាស្រេច ក្នុងការពង្រីកការធានាសន្តិសុខសម្រាប់ប៉ូឡូញ រួមទាំងការបង្កើនកម្លាំងយោធាអាមេរិក នៅក្នុងប្រទេសនេះ។

លោក Nawrocki បាននិយាយនៅក្នុងសន្និសីទសារព័ត៌មានមួយសម្រាប់ប្រព័ន្ធផ្សព្វផ្សាយប៉ូឡូញដែលផ្សាយដោយទូរទស្សន៍ TVP Info ថា៖«ក្នុងអំឡុងពេលការចរចានៃគណៈប្រតិភូពេញលេញ យើងថែមទាំង បានពិភាក្សាជាមួយប្រធានាធិបតីអាមេរិកលោក ដូណាល់ ត្រា និងរដ្ឋមន្ត្រីអំពីការពង្រីកវត្តមានកងទ័ពអាមេរិក នៅក្នុងប្រទេសប៉ូឡូញ ដែលធ្វើឲ្យខ្ញុំសប្បាយចិត្តជាពិសេស។ ស្របតាមសេចក្តីសម្រេចរបស់លោកប្រធានាធិបតី ត្រាំ និងលោករដ្ឋមន្ត្រី Sławomir Cenckiewicz ប្រមុខសន្តិសុខជាតិប៉ូឡូញ  រដ្ឋមន្ត្រីការពារជាតិអាមេរិកលោក Pete Hegseth បានថ្លែងថា  ពួកគេនឹងរៀបចំសំណើដែលប្រាកដជា នឹងគាំទ្រដល់ប្រទេសប៉ូឡូញ»។ 

មេដឹកនាំប៉ូឡូញរូបនេះ មិនបានបញ្ជាក់ពីអ្វី ដែលពិតប្រាកដ ក្រៅពីការបង្កើនវត្តមានយោធាអាមេរិក នៅក្នុងប្រទេសនេះ នឹងត្រូវបានរួមបញ្ចូលនៅក្នុងការធានាទាំងនេះ។

នៅពេលចាប់ផ្តើមការចរចាជាមួយលោក Nawrocki លោក ត្រាំ បាននិយាយថា សហរដ្ឋអាមេរិក នឹងមិនកាត់បន្ថយចំនួនយោធារបស់ខ្លួន នៅក្នុងប្រទេសប៉ូឡូញ ដែលមានទាហានអាមេរិកប្រហែល ១០.000 នាក់ កំពុងឈរជើងនោះទេ៕