អគ្គលេខាធិការអង្គការណាតូលោក Mark Rutte និយាយនៅថ្ងៃព្រហស្បតិ៍នេះថា រុស្ស៊ីគួរតែកុំនិយាយរឿងថាតើទាហានអន្តរជាតិត្រូវដាក់ពង្រាយនៅអ៊ុយក្រែន ដែលជាផ្នែកមួយនៃការធានាសន្តិសុខក្រោយសង្រ្គាម ។

លោក Rutte និយាយថា អ៊ុយក្រែនក្នុងនាមជាប្រទេសអធិបតេយ្យភាព មានសិទ្ធិសម្រេចចិត្តលើការរៀបចំសន្តិសុខរបស់ខ្លួន ដោយគ្មានការជ្រៀតជ្រែកពីខាងក្រៅ ហើយរុស្ស៊ីក៏គ្មានអ្វីត្រូវធ្វើជាមួយរឿងនេះដែរ ។

គួរឲ្យដឹងថា អ្នកនាំពាក្យក្រសួងការបរទេសរុស្ស៊ីអ្នកស្រី Maria Zakharova បាននិយាយប្រាប់ក្រុមអ្នកសារព័ត៌មាននៅថ្ងៃព្រហស្បតិ៍នេះថា រុស្ស៊ីមិនមានគម្រោងពិភាក្សាពីលទ្ធភាពនៃការដាក់ពង្រាយយោធាបរទេស នៅក្នុងទឹកដីអ៊ុយក្រែននោះទេ ទោះក្នុងទម្រង់បែបណាក៏ដោយ ដោយហៅវិធានការនេះថា មិនអាចទទួលយកបានឡើយ ។

អ្នកស្រី Zakharova និយាយប្រាប់សន្និសីទសារព័ត៌មានប្រចាំសប្តាហ៍ថា រុស្ស៊ី នឹងមិនពិភាក្សាលើការអន្តរាគមន៍បរទេសនៅអ៊ុយក្រែនឡើយ ទោះក្នុងទម្រង់ណាក៏ដោយ ដែលនេះជាមូលដ្ឋានមិនអាចទទួលយកបាននោះទេ ហើយមានតែធ្វើឲ្យខូចដល់សន្តិសុខតែប៉ុណ្ណោះ ។

ក្រុមមេដឹកនាំពិភពលោកចំនួន ៣០រូប នឹងជួបពិភាក្សាការងារជាមួយប្រធានាធិបតីអ៊ុយក្រែនលោក Volodymyr Zelenskiy នៅថ្ងៃព្រហស្បតិ៍នេះ ពាក់ព័ន្ធនឹងការធានាសន្តិសុខនាពេលអនាគតដល់ទីក្រុងគីវ បើសិនជាមានបទឈប់បាញ់ជាមួយរុស្ស៊ី ដោយសង្ឃឹមថា ពួកគេនឹងធ្វើបានគ្រប់គ្រាន់ ក្នុងការបញ្ចុះបញ្ចូលសហរដ្ឋអាមេរិកឲ្យគាំទ្រកិច្ចខិតខំរបស់ពួកគេ ៕