មជ្ឈមណ្ឌលប្រយុទ្ធប្រឆាំងព័ត៌មានមិនពិត នៅក្រោមការគ្រប់គ្រងរបស់រដ្ឋបាលប្រធានាធិបតីទួរគី បានបដិសេធរបាយការណ៍របស់ប្រព័ន្ធផ្សព្វផ្សាយអ៊ីស្រាអែលមួយចំនួនអំពីការពាក់ព័ន្ធរបស់សាធារណរដ្ឋនេះ ក្នុងការរៀបចំផែនការធ្វើឃាតរដ្ឋមន្ត្រីសន្តិសុខជាតិអ៊ីស្រាអែលលោក Itamar Ben-Gvir។

មជ្ឈមណ្ឌលនេះ បាននិយាយក្នុងសេចក្តីថ្លែងការណ៍មួយថា៖«ការលើកឡើងអំពីប្រទេសរបស់យើង នៅក្នុងព័ត៌មានអំពីផែនការប្រឆាំងនឹងរដ្ឋមន្ត្រីអ៊ីស្រាអែល ដែលបានលេចចេញ នៅក្នុងប្រព័ន្ធផ្សព្វផ្សាយ        អ៊ីស្រាអែលមួយចំនួន គឺជាលទ្ធផលនៃយុទ្ធនាការផ្សព្វផ្សាយព័ត៌មានមិនពិតប្រឆាំងនឹងប្រទេសទួរគី។ វាត្រូវបានគេដឹងថា ព្រឹត្តិការណ៍នេះ ដែលបានបង្ហាញដោយសារព័ត៌មានអ៊ីស្រាអែលថ្មី គឺពិតជាទាក់ទងនឹងឧប្បត្តិហេតុដែលបានកើតឡើង កាលពី ៨ខែមុន។ លើសពីនេះទៅទៀត សេចក្តីថ្លែងការណ៍របស់អ្នកជាប់ឃុំដែលពួកគេមិនមានអ្វីពាក់ព័ន្ធជាមួយទួរគី ត្រូវបានបញ្ជាក់ដោយតំណាងកាកបាទក្រហម»។

មជ្ឈមណ្ឌលនេះ បានបញ្ជាក់ថា គោលបំណងសំខាន់នៃការផ្សព្វផ្សាយព័ត៌មានបែបនេះគឺ «មានចេតនាបង្កើតរូបភាពមិនពិតរបស់ទួរគី នៅក្នុងសហគមន៍អន្តរជាតិ ដោយហេតុនេះ ធ្វើឲ្យខូចដល់គោលនយោបាយរបស់ខ្លួនចំពោះប៉ាឡេស្ទីន»។

នាពេលថ្មីៗនេះ កាសែត The Times of Israel បានរាយការណ៍ថា សមាជិកនៃក្រុមហាម៉ាសនៅតំបន់     វេសបែង (West Bank) ត្រូវបានចាប់ខ្លួន ក្នុងរយៈពេលប៉ុន្មានសប្តាហ៍កន្លងមកនេះ ក្នុងអំឡុងពេលប្រតិបត្តិការរួមគ្នា ដោយសេវាសន្តិសុខទូទៅ Shabak (Shin Bet) និងកងកម្លាំងការពារអ៊ីស្រាអែល។ ពួកគេកំពុងរៀបចំការប៉ុនប៉ងធ្វើឃាតលើលោក Ben-Gvir ហើយត្រូវបានចោទប្រកាន់ថា បានប្រព្រឹត្ត        «ក្រោមការបញ្ជាពីទីបញ្ជាការរបស់ក្រុមភេរវករ នៅក្នុងប្រទេសទួរគី»។ យោងតាមរបាយការណ៍ ពួកគេបានទិញយានដ្រូនជាច្រើនគ្រឿង ដើម្បីបំពាក់គ្រឿងផ្ទុះ ដើម្បីវាយប្រហារលើរដ្ឋមន្ត្រីរូបនេះ៕