ប្រភពចំនួនពីរដែលដឹងពីបញ្ហានេះបាននិយាយនៅថ្ងៃព្រហស្បតិ៍ (៤ កញ្ញា) ថា សហរដ្ឋអាមេរិក នឹងបញ្ឈប់ជំនួយផ្នែកសន្តិសុខមួយចំនួនសម្រាប់បណ្តាប្រទេសអឺរ៉ុប ដែលនៅជិតព្រំដែនជាមួយរុស្ស៊ី។

ផែនការនេះកើតឡើងនៅពេលដែលលោកប្រធានាធិបតី Donald Trump បន្តគោលនយោបាយការបរទេស "យកអាមេរិកជាធំ" របស់លោក ដែលមើលឃើញរដ្ឋបាលទីក្រុងវ៉ាស៊ីនតោន បានកាត់បន្ថយជំនួយបរទេសអស់ជាច្រើនទូទាំងពិភពលោក និងកំពុងជំរុញឱ្យបណ្តាប្រទេសនៅអឺរ៉ុប ឱ្យរ៉ាប់រងការចំណាយបន្ថែមទៀតលើយោធារបស់ពួកគេ។

សង្រ្គាមរបស់រុស្ស៊ីជាមួយអ៊ុយក្រែន បានបង្កើនក្ដីបារម្ភនៅអឺរ៉ុប អំពីអស្ថិរភាពក្នុងតំបន់ និងលទ្ធភាពនៃប្រតិបត្តិការយោធាបន្ថែមទៀតពីទីក្រុងមូស្គូ។ អ្នកទទួលជំនួយសំខាន់ៗរបស់អាមេរិកនោះរួមមាន អេស្តូនី ឡាតវី និងលីទុយអានី ដែលជាស្លាបខាងកើតរបស់អង្គការណាតូ និងសុទ្ធតែជាប់ព្រំដែនរុស្ស៊ី។

សភាសហរដ្ឋអាមេរិក បានអនុម័តការផ្តល់មូលនិធិសម្រាប់ផែនការជំនួយមួយនោះ ដែលស្ថិតនៅក្រោមក្រសួងការពារជាតិ ប៉ុន្តែមានប្រសិទ្ធិភាពតែរហូតដល់ចុងខែកញ្ញា ឆ្នាំ២០២៦ ប៉ុណ្ណោះ ហើយសេចក្ដីរាយការណ៍បានឱ្យដឹងថា រដ្ឋបាលរបស់លោក Trump មិនបានស្នើឱ្យបន្ថែមពេលលើកម្មវិធីនេះទេ៕