ក្បួនរថយន្តជំនួយមនុស្សធម៌ពីប្រទេសអារ៉ាប់រួមកាលពីថ្ងៃព្រហស្បតិ៍ បានចូលក្នុងតំបន់ហ្កាហ្សាស្ទ្រីប តាមច្រកព្រំដែន Rafah ចូលទៅក្នុងប្រទេសអេហ្ស៊ីប ដែលជាផ្នែកមួយនៃកិច្ចខិតខំប្រឹងប្រែងដែលកំពុងបន្តរបស់ប្រទេសនេះ ដើម្បីគាំទ្រប្រជាជនប៉ាឡេស្ទីន ចំពេលមានការវាយប្រហាររបស់អ៊ីស្រាអែល នៅតែ   បន្ត។

ក្បួនរថយន្តនេះ មានរថយន្តដឹកទំនិញចំនួន ២៣គ្រឿង ដែលក្នុងនោះ ១៦ គ្រឿង បានដឹកឧបករណ៍បរិក្ខារពេទ្យដែលបរិច្ចាគដោយប្រទេសអារ៉ាប់រួម ដល់អង្គការសុខភាពពិភពលោកសម្រាប់មន្ទីរពេទ្យ នៅតំបន់ហ្កាហ្សា ហើយមានថ្នាំពេទ្យ កង្ហារ ម៉ាស៊ីនលាងឈាម ឧបករណ៍ជំនួយផ្លូវដង្ហើម ម៉ាស៊ីនបូមទឹក និងឧបករណ៍ត្រួតពិនិត្យជាតិស្ករក្នុងឈាម។

ការដឹកជញ្ជូននោះ រួមមានគ្រឿងសង្ហារឹម និងឧបករណ៍ថែទាំសុខភាពសំខាន់ៗ ដូចជាគ្រែមន្ទីរពេទ្យទំនើប គ្រែកុមារនិងទារកទើបនឹងកើត រទេះរុញអ្នកជំងឺ រទេះរុញ និងឈើច្រត់សម្រាប់ជនពិការ រួមជាមួយនឹងទូទឹកកកពិសេសសម្រាប់រក្សាទុកថ្នាំ និងថ្នាំបង្ការ។

បន្ថែមពីលើនេះ រថយន្តដឹកទំនិញចំនួន ៧គ្រឿង បានដឹកជញ្ជូនស្បៀងអាហារ ដើម្បីដោះស្រាយតម្រូវការអាហារូបត្ថម្ភជាបន្ទាន់របស់គ្រួសារប៉ាឡេស្ទីន នៅក្នុងតំបន់ហ្កាហ្សា។ នេះបើយោងតាមទីភ្នាក់ងារសារព័ត៌មានអារ៉ាប់ WAM។

សារព័ត៌មាន WAM បានបន្ថែមថា ប្រទេសអារ៉ាប់រួម កំពុងផ្តល់ជំនួយមនុស្សធម៌ដល់ប្រជាជនប៉ាឡេស្ទីន នៅតំបន់ហ្កាហ្សា តាមរយៈយុទ្ធនាការប្រតិបត្តិការ Chivalrous Knight 3 ក្នុងគោលបំណងកាត់បន្ថយការឈឺចាប់របស់បណ្តាក្រុមដែលងាយរងគ្រោះ៕