សមាជិកសភានៃគណបក្សកាន់អំណាចរបស់ប្រទេសជប៉ុន នឹងបោះឆ្នោតនៅថ្ងៃចន្ទសប្ដាហ៍ក្រោយ ដើម្បីសម្រេចថា តើត្រូវរៀបចំការបោះឆ្នោតពិសេសជ្រើសរើសមេដឹកនាំដែរ ឬអត់ ជាដំណើរការដែលអាចបញ្ចប់តំណែងនាយករដ្ឋមន្ត្រីរបស់លោក Shigeru Ishiba និងជះឥទ្ធិពលយ៉ាងខ្លាំងទៅលើប្រទេសមានសេដ្ឋកិច្ចធំបំផុតទី៤ របស់ពិភពលោក។

ក្ដីបារម្ភអំពីភាពមិនប្រាកដប្រជាផ្នែកនយោបាយនេះ បាននាំឲ្យទៅដល់ការលក់ចេញប្រាក់យ៉េន និងសញ្ញាប័ណ្ណរដ្ឋាភិបាលជប៉ុន (JGB) នៅសប្តាហ៍នេះ។ ទោះបីជាការមិនទាន់មានការសម្រេចផ្នែកគោលនយោបាយ ជុំវិញការបោះឆ្នោតនេះ អាចបន្ថែមផលប៉ះពាល់ដល់សេដ្ឋកិច្ចដែលរងគ្រោះដោយសារការដំឡើងពន្ធរបស់សហរដ្ឋអាមេរិកក៏ដោយ ក៏ទីផ្សារកំពុងផ្តោតលើលទ្ធភាពនៃការជំនួសតំណែងលោក Ishiba ដោយអ្នកតស៊ូមតិជំទាស់គោលនយោបាយសារពើពន្ធ និងរូបិយវត្ថុដ៏ធូររលុង ដូចជាលោក Sanae Takaichi ដែលបានរិះគន់ការដំឡើងអត្រាការប្រាក់របស់ធនាគារកណ្តាលជប៉ុន។

លោក Katsutoshi Inadome អ្នកយុទ្ធសាស្រ្តជាន់ខ្ពស់នៅក្រុមហ៊ុន Sumitomo Mitsui Trust Asset Management បានលើកឡើងថា៖ «អ្នកវិនិយោគហាក់រំពឹងថា គណបក្ស LDP (ប្រជាធិបតេយ្យសរីនិយម) នឹងរៀបចំការបោះឆ្នោតជ្រើសរើសអ្នកដឹកនាំ ហើយលោក Ishiba ដែលត្រូវបានស្គាល់ថា ជាអ្នកគាំទ្រការចំណាយទាប់របស់រដ្ឋាភិបាល នឹងបាត់បង់តំណែង»។ អ្នកយុទ្ធសាស្ត្ររូបនេះ បានបន្ថែមថា៖ «យើងទំនងជានឹងឃើញការលក់មូលបត្របំណុលរដ្ឋាភិបាលជប៉ុនបន្ថែមទៀត ខណៈដែលអ្នកណាក៏ដោយ ដែលស្នងតំណែងរបស់លោក Ishiba ប្រហែលជានឹងបើកចំហរដល់ការបន្ធូរបន្ថយគោលនយោបាយសារពើពន្ធជាងរូបលោក»។

លោក Ishiba បានបដិសេធការអំពាវនាវពីក្នុងបក្ស LDP របស់លោក ដែលចង់ឲ្យលោកចុះចេញពីតំណែង និងទទួលខុសត្រូវ ចំពោះការបរាជ័យរបស់គណបក្ស កាលពីខែកក្កដា នៅក្នុងការបោះឆ្នោតសភាជាន់ខ្ពស់។ តែយ៉ាងណាក្ដី ការបន្តកាន់អំណាចរបស់លោកកាន់តែជួបការលំបាក។ ដោយបានបាត់បង់សំឡេងភាគច្រើន នៅក្នុងសភាទាំង២ ក្រុមចម្រុះកំពុងកាន់អំណាចរបស់លោក ត្រូវការការគាំទ្រពីគណបក្សប្រឆាំង ដើម្បីអនុម័តច្បាប់។ ច្បាប់របស់គណបក្ស តម្រូវឲ្យសមាជិករបស់បក្ស LDP យ៉ាងហោចពាក់កណ្តាល ស្នើឲ្យមានការប្រកួតប្រជែង ដែលអាចនឹងធ្វើឡើងក្នុងខែនេះ ឬក្នុងខែតុលា៕