ប្រទេសហ្វាំងឡង់កំពុងចូលរួមក្នុងសេចក្តីប្រកាស ស្តីពីដំណោះស្រាយសន្តិភាពនៃបញ្ហាប៉ាឡេស្ទីន និងការអនុវត្តដំណោះស្រាយរដ្ឋ២។ នេះបើតាមការឲ្យដឹងពីប្រទេសអឺរ៉ុបខាងជើងមួយ នៅក្នុងសេចក្តីថ្លែងការណ៍មួយ នាថ្ងៃសុក្រ (ទី៥ ខែកញ្ញា) នេះ។

សេចក្តីប្រកាសនោះ គឺជាលទ្ធផលនៃសន្និសីទអន្តរជាតិ នៅអង្គការសហប្រជាជាតិ កាលពីខែកក្កដា ដែលរៀបចំដោយអារ៉ាប៊ីសាអ៊ូឌីត និងបារាំង ស្តីពីជម្លោះដែលអូសបន្លាយរាប់ទសវត្សរ៍។ សហរដ្ឋអាមេរិក និងអ៊ីស្រាអែល បានធ្វើពហិការមិនចូលរួមព្រឹត្តិការណ៍នោះទេ។

តាមរយៈបណ្ដាញសង្គម X រដ្ឋមន្ត្រីការបរទេសហ្វាំងឡង់ លោកស្រី Elina Valtonen បានឲ្យដឹងថា៖ «ដំណើរការដែលដឹកនាំដោយប្រទេសបារាំង និងអារ៉ាប៊ីសាអ៊ូឌីត គឺជាកិច្ចប្រឹងប្រែងអន្តរជាតិដ៏សំខាន់បំផុត ក្នុងរយៈពេលជាច្រើនឆ្នាំ ដើម្បីបង្កើតលក្ខខណ្ឌនានា សម្រាប់ដំណោះស្រាយរដ្ឋ២»។

ជំហានដំបូងដែលមានចែងក្នុងសេចក្តីប្រកាសនេះ គឺដើម្បីបញ្ចប់សង្គ្រាមរយៈពេលជិត ២ឆ្នាំ រវាងអ៊ីស្រាអែល និងក្រុមសកម្មប្រយុទ្ធហាម៉ាសប៉ាឡេស្ទីន នៅតំបន់ហ្កាហ្សា។

អារ៉ាប៊ីសាអ៊ូឌីត និងបារាំង បានអំពាវនាវឲ្យបណ្តាប្រទេស នៅអង្គការសហប្រជាជាតិគាំទ្រសេចក្តីប្រកាសដែលគូសបញ្ជាក់ពី «ជំហានជាក់ស្តែង កំណត់ពេលវេលា និងមិនអាចកែប្រែវិញបាន» ឆ្ពោះទៅរកការអនុវត្តដំណោះស្រាយរដ្ឋ២។

មិនដូចប្រទេសអឺរ៉ុបមួយចំនួនផ្សេងទៀត ដូចជាអេស្ប៉ាញ និងន័រវែសជាដើម ហ្វាំងឡង់មិនបានទទួលស្គាល់ប៉ាឡេស្ទីនជារដ្ឋនោះទេ។ រដ្ឋាភិបាលចម្រុះហ្វាំងឡង់ មានការបែកបាក់ផ្ទៃក្នុង ជុំវិញការទទួលស្គាល់ជាផ្លូវការ៕