ប្រធានាធិបតីសហរដ្ឋអាមេរិក លោក Donald Trump បានដាក់ចេញឈ្មោះមួយផ្សេងទៀតសម្រាប់ទីភ្នាក់ងារធំបំផុតរបស់រដ្ឋាភិបាល។ លោកបានចុះហត្ថលេខាលើក្រឹត្យមួយសម្រាប់ក្រសួងការពារជាតិហៅក្រសួងនេះថាក្រសួងសង្គ្រាម។ លោក Trump បានចុះហត្ថលេខាលើក្រឹត្យកាលពីថ្ងៃសុក្រនៅការិយាល័យ Oval office។ លោកបាននិយាយថា «ខ្ញុំគិតថាវាជាឈ្មោះដែលសមស្របជាង ជាពិសេសនៅក្នុងពន្លឺដែលពិភពលោកកំពុងស្ថិតនៅក្នុងពេលបច្ចុប្បន្ននេះ។ យើងមានយោធាខ្លាំងបំផុតនៅក្នុងពិភពលោក។ យើងមានឧបករណ៍ដ៏អស្ចារ្យបំផុត យើងមានក្រុមហ៊ុនផលិតឧបករណ៍ដ៏អស្ចារ្យបំផុតរហូតមកដល់ពេលនេះ»។

ក្រឹត្យនេះនឹងអនុញ្ញាតឱ្យរដ្ឋមន្ត្រីក្រសួងការពារជាតិ លោក Pete Hegseth ប្រើប្រាស់តំណែងបន្ទាប់បន្សំដូចជា «រដ្ឋមន្ត្រីសង្គ្រាម»។ 

គេហទំព័ររបស់ក្រសួងការពារជាតិ និងគណនីប្រព័ន្ធផ្សព្វផ្សាយសង្គមក៏ត្រូវបានជំនួសភ្លាមៗបន្ទាប់ពីការចុះហត្ថលេខាលើក្រឹត្យនេះ។ ចំណាត់ការនេះធ្វើឡើងជាផ្នែកនៃកិច្ចខិតខំប្រឹងប្រែងរបស់រដ្ឋបាលក្នុងការព្យាករពីភាពរឹងមាំនៃយោធារបស់សហរដ្ឋអាមេរិក។ លោក Trump បានបង្ហាញចំណាប់អារម្មណ៍ដដែលៗក្នុងការប្តូរឈ្មោះក្រសួង។ ឈ្មោះ «ក្រសួងសង្គ្រាម» ពុំត្រូវបានប្រើប្រាស់ចាប់តាំងពីទសវត្សរ៍ឆ្នាំ១៩៤០ នៅពេលដែលមន្ត្រីព្យាយាមសង្កត់ធ្ងន់លើតួនាទីរបស់មន្ទីរបញ្ចកោណក្នុងការទប់ស្កាត់ជម្លោះ។ ប្រព័ន្ធផ្សព្វផ្សាយរបស់សហរដ្ឋអាមេរិកនិយាយថា ការផ្លាស់ប្តូរជាផ្លូវការនឹងទាមទារឲ្យមានការអនុម័តពីសមាជិកសភា។