រដ្ឋមន្រ្តីការបរទេសកូរ៉េខាងត្បូងលោក Cho Hyun និយាយកាលពីថ្ងៃសៅរ៍ថា ប្រធានាធិបតីកូរ៉េខាងត្បូងលោក Lee Jae Myung បានបញ្ជាឲ្យមានកិច្ចខិតខំអស់ពីលទ្ធភាព ដើម្បីឆ្លើយតបនឹងការចាប់ខ្លួនពលរដ្ឋកូរ៉េរាប់រយនាក់ នៅក្នុងការវាយឆ្មក់អន្តោប្រវេសន៍របស់សហរដ្ឋអាមេរិកលើរោងចក្រផលិតអាគុយរបស់ក្រុមហ៊ុនរថយន្ត Hyundai Motor ។ 

លោក Cho និយាយថា រដ្ឋាភិបាលរបស់លោក បានបង្កើតក្រុមការងារ ដើម្បីឆ្លើយតបចំពោះការចាប់ខ្លួនកាលពីថ្ងៃព្រហស្បតិ៍នូវជនជាតិកូរ៉េជាង ៣០០នាក់ នៅរោងចក្រ ស្ថិតក្នុងរដ្ឋភាគខាងត្បូង Georgia ហើយលោកអាចនឹងធ្វើដំណើរទៅកាន់ទីក្រុងវ៉ាស៊ីនតោន ដើម្បីជួបក្រុមមន្រ្តី បើសិនជាវាចាំបាច់ ។

ការចាប់ខ្លួនកម្មករ ៤៧៥នាក់នៅរោងចក្រមួយនេះ ស្ថិតនៅជិតទីក្រុង Savannah និងជាផ្នែកមួយនៃវិធានការបង្រ្កាបកើនឡើងរបស់ប្រធានាធិបតីសហរដ្ឋអាមេរិកលោក Donald Trump លើជនអន្តោប្រវេសន៍នោះ បានក្លាយជាការអនុវត្តច្បាប់លើទីតាំងមួយកន្លែងធំបំផុតនៅក្នុងប្រវត្តិសាសន៍របស់ក្រសួងសន្តិសុខមាតិភូមិសហរដ្ឋអាមេរិក ។

ការចាប់ខ្លួនកម្មករ ៤៧៤នាក់នៅក្នុងឧបទ្ទេវហេតុនេះ អាចនឹងធ្វើឲ្យភាពតានតឹងកាន់តែអាក្រក់ខ្លាំងរវាងរដ្ឋបាលលោក Trump និងទីក្រុងសេអ៊ូល ដែលជាសម្ព័ន្ធមិត្តអាស៊ីដ៏សំខាន់ និងជាអ្នកវិនិយោគទុននៅសហរដ្ឋអាមេរិក ។

ពួកគេបានជាប់មានវិវាទផងដែរ ជុំវិញរឿងរ៉ាវលម្អិតនៃកិច្ចព្រមព្រៀងពាណិជ្ជកម្មដែលរួមបញ្ចូលការវិនិយោគទុនរបស់កូរ៉េខាងត្បូង ៣៥០ពាន់លានដុល្លារ នៅសហរដ្ឋអាមេរិក ៕