រដ្ឋមន្រ្តីការបរទេសអេហ្ស៊ីបលោក Badr Abdelatty ដែលប្រទេសរបស់លោកគឺជាអ្នកសម្របសម្រួលដ៏សំខាន់មួយ ក្នុងកិច្ចខិតខំបញ្ចប់សង្រ្គាមហ្កាហ្សា និយាយកាលពីថ្ងៃសៅរ៍ថា ការរៀបរាប់ថាការជម្លៀសជនប៉ាឡេស្ទីនដោយស្ម័គ្រចិត្ត គឺជារឿងពុំសមហេតុសមផលនោះទេ ។

នៅពេលមុននេះ អ៊ីស្រាអែលបានអំពាវនាវឲ្យពលរដ្ឋរស់នៅក្នុងទីក្រុងហ្កាហ្សា ចាកចេញទៅកាន់តំបន់ភាគខាងត្បូង ពេលដែលកងកម្លាំងរបស់ពួកគេ រុលចូលកាន់តែជ្រៅទៅក្នុងតំបន់ទីក្រុងធំបំផុតនៅដែនដីបិទច្រកមួយនេះ ។

អំឡុងសន្និសីទសារព័ត៌មានរួមគ្នាជាមួយលោក Philippe Lazzarini ដែលជាអគ្គស្នងការទីភ្នាក់ងារជនភៀសខ្លួនប៉ាឡេស្ទីនអង្គការសហប្រជាជាតិ(UN) លោក Abdelatty និយាយថា បើសិនជាមានគ្រោះទុរ្ភិក្សបង្កើតឡើងដោយមនុស្សនៅតំបន់ហ្កាហ្សា វានឹងជំរុញឲ្យពួកគេចាកចេញពីដែនដីរបស់ពួកគេ ។

នាយករដ្ឋមន្រ្តីអ៊ីស្រាអែលលោក Benjamin Netanyahu បានគាំទ្រគំនិតថា ជនប៉ាឡេស្ទីននៅតំបន់ហ្កាហ្សា គួរតែអនុញ្ញាតឲ្យចាកចេញដោយស្ម័គ្រចិត្ត ហើយលោកបានលើកឡើងថា ប្រទេសដទៃគួរតែទទួលយកពួកគេ ។

ការិយាល័យរបស់លោក Netanyahu និយាយកាលពីថ្ងៃសុក្រថា លោកបាននិយាយពីសិទ្ធិមនុស្សជាមូលដ្ឋានរបស់បុគ្គលរាល់រូប ដើម្បីជ្រើសរើសទីកន្លែងដែលពួកគេរស់នៅ ជាពិសេសអំឡុងពេលសម័យសង្រ្គាម ។

រដ្ឋមន្រ្តីអេហ្ស៊ីបរូបនេះ បាននិយាយផងដែរថា លោកបាននិយាយជាមួយប្រេសិតពិសេសសហរដ្ឋអាមេរិកលោក Steve Witkoff កាលពីថ្ងៃសុក្រ និងពិភាក្សាពីការបង្កើនកិច្ចខិតខំ ដើម្បីអនុវត្តសំណើបទឈប់បាញ់ចុងក្រោយ ។

លោកបានដាក់ការស្តីបន្ទោសលើអ៊ីស្រាអែលសម្រាប់អ្វីដែលលោករៀបរាប់ថា វាគឺជាការមិនអើពើរបស់ពួកគេ ក្នុងការពន្យាពេលឈានដល់បទឈប់បាញ់ ។ 

កាលពីខែសីហាកន្លងទៅ ក្រុមហាម៉ាស បានយល់ព្រមនឹងសំណើបទឈប់បាញ់រយៈពេល ៦០ថ្ងៃ ជាមួយអ៊ីស្រាអែល ដែលរួមទាំងការប្រគល់ចំណាប់ថ្នូរចំនួនពាក់កណ្តាលដែលជាប់ខ្លួននៅតំបន់ហ្កាហ្សា ហើយអ៊ីស្រាអែល ត្រូវដោះលែងអ្នកទោសប៉ាឡេស្ទីនមួយចំនួន ៕