ទូរទស្សន៍រដ្ឋ NHK របស់ជប៉ុន បាននិយាយនៅថ្ងៃអាទិត្យ (៧ កញ្ញា) នេះថា នាយករដ្ឋមន្ត្រីជប៉ុន លោក Shigeru Ishiba បានសម្រេចចិត្តលាលែងពីតំណែងរបស់លោក ដើម្បីជៀសវាងការបែកបាក់ក្នុងគណបក្សប្រជាធិបតេយ្យសេរី (LDP) ដែលកំពុងកាន់អំណាច។ ក្រុមចម្រុះដឹកនាំដោយបក្ស LDP របស់លោក Ishiba បានបាត់បង់សំឡេងភាគច្រើននៅក្នុងសភា បន្ទាប់ពីការបោះឆ្នោតកាលពីខែកក្កដា។

ការិយាល័យនាយករដ្ឋមន្ត្រីជប៉ុន មិនបានឆ្លើយតបភ្លាមៗចំពោះសំណើអត្ថាធិប្បាយលើរឿងនេះទេ។ សមាជិកសភាបក្ស LDP គ្រោងបោះឆ្នោតនៅថ្ងៃចន្ទស្អែកនេះ ថាតើត្រូវរៀបចំការបោះឆ្នោតរើសថ្នាក់ដឹកនាំវិសាមញ្ញ ឬក៏យ៉ាងណា។

លោក Ishiba ធ្លាប់ជំទាស់នឹងការអំពាវនាវឱ្យលាលែងពីតំណែងបែបនេះ ហើយប្ដេជ្ញាម្តងទៀតកាលពីថ្ងៃអង្គារថា លោកមិនមានចេតនាភ្លាមៗក្នុងការចុះពីតំណែងនោះទេ ហើយថា លោកនឹងធ្វើការសម្រេចចិត្តពីមធ្យោបាយទទួលខុសត្រូវចំពោះការចាញ់ឆ្នោតសភា នៅក្នុង "ពេលវេលាដ៏សមស្របមួយ"។

លោក Ishiba បានប្រាប់អ្នកយកព័ត៌មានកាលពីថ្ងៃអង្គារថា "ការធ្វើការលើបញ្ហាប្រឈមដែលគណបក្សត្រូវដោះស្រាយភ្លាមៗ គឺជាវិធីសាស្រ្តមួយក្នុងការទទួលខុសត្រូវ" ដោយលើកឡើងពីតម្រូវការវិធានការសេដ្ឋកិច្ចសម្រាប់វិស័យដែលទទួលរងពីអតិផរណា ឬផលប៉ះពាល់ពីពន្ធគយរបស់សហរដ្ឋអាមេរិក។

ជំនួយការជិតស្និទ្ធរបស់លោក Ishiba គឺអគ្គលេខាធិការបក្ស LDP លោក Hiroshi Moriyama ធ្លាប់និយាយកាលពីថ្ងៃអង្គាររួចហើយថា នាយករដ្ឋមន្រ្តីជប៉ុនរូបនេះមានបំណងលាលែងពីមុខតំណែងរបស់លោក។ ការប្រកាសរបស់លោក Moriyama បានធ្វើឡើងបន្ទាប់ពីបក្ស LDP កោះប្រជុំពេញអង្គរួមនៃសភាទាំងពីរ ដើម្បីវាយតម្លៃការចាញ់ឆ្នោត នៅក្នុងការបោះឆ្នោតសភាជាន់ខ្ពស់កាលពីពេលកន្លងទៅ។