ប្រធានាធិបតីអាមេរិក លោក Donald Trump បានចុះហត្ថលេខាលើក្រឹត្យថ្មីមួយដែលផ្តល់ការលើកលែងពន្ធមួយចំនួនភ្លាមៗនៅថ្ងៃចន្ទ (៨ កញ្ញា) ស្អែកនេះ ដល់បណ្ដាដៃគូពាណិជ្ជកម្មដែលបានចុះកិច្ចព្រមព្រៀងលើការនាំចេញឧស្សាហកម្ម ដូចជាដែកនីកែល មាស និងលោហៈផ្សេងទៀត ក៏ដូចជាសមាសធាតុឱសថ និងសារធាតុគីមីផងដែរ។

ក្រឹត្យចុងក្រោយបំផុតនេះ បានកំណត់ផលិតផលច្រើនជាង ៤៥ប្រភេទ ដែលទទួលបានការលើកលែងពន្ធនាំចូលដល់អត្រា ០% ពី "ដៃគូជ្រើសរើស" ដែលធ្វើកិច្ចព្រមព្រៀងក្របខណ្ឌដើម្បីកាត់បន្ថយ “ពន្ធបដិការ” របស់លោក Trump និងពន្ធកាតព្វកិច្ច ដែលដាក់ក្រោមមាត្រាទី២៣២ នៃច្បាប់សន្តិសុខជាតិ។

ក្រឹត្យដែលបានចុះហត្ថលេខាកាលពីថ្ងៃសុក្រ (៥ កញ្ញា) បានដាក់ពន្ធគយរបស់អាមេរិកឱ្យស្របតាមការប្តេជ្ញាចិត្តរបស់ខ្លួននៅក្នុងកិច្ចព្រមព្រៀងក្របខណ្ឌដែលមានស្រាប់ រួមទាំងប្រទេសសម្ព័ន្ធមិត្ត ដូចជាជប៉ុន និងសហភាពអឺរ៉ុបជាដើម។ ក្រឹត្យនិយាយថា ការលើកលែងសម្រាប់ប្រទេសដែលមានកិច្ចព្រមព្រៀងពាណិជ្ជកម្មជាមួយអាមេរិកនោះ ត្រូវកំណត់ឱ្យចាប់ផ្តើមនៅម៉ោងក្នុងស្រុក ១២:០១នាទី រំលងអាធ្រាត្រឈានចូលថ្ងៃចន្ទ ទី៨ កញ្ញា។

ក្នុងក្រឹត្យនោះ លោក Trump និយាយថា ការបន្ថយពន្ធនេះគឺអាស្រ័យលើ "វិសាលភាព និងតម្លៃសេដ្ឋកិច្ចនៃការប្តេជ្ញាចិត្តរបស់ដៃគូពាណិជ្ជកម្មចំពោះសហរដ្ឋអាមេរិក ក្នុងកិច្ចព្រមព្រៀងរបស់ខ្លួនស្តីពីពាណិជ្ជកម្មបដិការ" និងផលប្រយោជន៍ជាតិរបស់អាមេរិក។ ការកាត់បន្ថយពន្ធនេះគ្របដណ្តប់លើទំនិញដែល "មិនអាចដាំដុះ ជីកយក ឬផលិតដោយធម្មជាតិបាននៅសហរដ្ឋអាមេរិក" ឬផលិតបានក្នុងបរិមាណគ្រប់គ្រាន់ដើម្បីបំពេញតម្រូវការក្នុងស្រុក៕