ឧត្តរមានជ័យ៖ ឯកឧត្ដម មាន ចាន់យ៉ាដា អភិបាលខេត្តឧត្ដរមានជ័យ នៅរសៀលថ្ងៃទី០៧ ខែកញ្ញា ឆ្នាំ២០២៥ បានដឹកនាំក្រុមការងារ នាំយកទេយ្យទាន គ្រឿងឧបភោគ-បរិភោគ និងបច្ច័យ ប្រគេនដល់ព្រះសង្ឃ ចំនួន៣វត្ត នៅតាមបន្ទាត់ព្រំដែន កម្ពុជា-ថៃ រួមមានវត្តតាមាន់សែនជ័យ វត្តជប់គគីរ និងវត្តថ្មដូន ស្ថិតក្នុងស្រុកបន្ទាយអំពិល ក្នុងឱកាសពិធីកាន់បិណ្ឌទី០១ នៃពិធីបុណ្យភ្ជុំបិណ្ឌប្រពៃណីជាតិខ្មែរ។ពិធីនេះត្រូវបានរៀបចំឡើងក្នុងគោលបំណងបង្ហាញពីការយកចិត្តទុកដាក់ខ្ពស់របស់រដ្ឋបាលខេត្តចំពោះវិស័យព្រះពុទ្ធសាសនា ដែលជាសាសនារបស់រដ្ឋ ក៏ដូចជាការចូលរួមចំណែកក្នុងការថែរក្សា និងលើកស្ទួយទំនៀមទម្លាប់ប្រពៃណីរបស់ជាតិ ដើម្បីសន្សំកុសលផលបុណ្យ ព្រមទាំងបាន ឧទ្ទិសមគ្គផល ជូនដល់ដួងវិញ្ញាណក្ខន្ធបុព្វការីជនមានមាតាបីតា ជីដូនជីតា និងញាតិកាទាំងប្រាំពីរសណ្តាន ដែលបានចែកឋានទៅកាន់លោកខាងមុខ ជាពិសេសក៏បានឆ្លុះបញ្ចាំងពីសាមគ្គីភាព និងការរួបរួមគ្នារវាងអាជ្ញាធរដែនដី និងពុទ្ធបរិស័ទ៕ដោយ៖ ឃិន សារិទ្ធ