ក្រសួងអប់រំ យុវជន និងកីឡា នៅថ្ងៃទី៧កញ្ញាម្សិលមិញនេះ បានរៀបចំ​កិច្ច​ប្រជុំ​ណែនាំ​បច្ចេក​ទេស​ដល់​គណៈកម្មការស្រង់ បូកពិន្ទុដោយកុំព្យូទ័រ និងផ្ទៀងផ្ទាត់ពិន្ទុ សម្រាប់ការ​ប្រឡង​សញ្ញា​បត្រ​មធ្យម​សិក្សាទុតិយភូមិ សម័យប្រឡង៖ ២៨ សីហា ២០២៥។ កិច្ចប្រជុំនេះ ក៏មាន​ការ​ចូល​រួម​ពីអង្គភាពប្រឆាំងអំពើពុករលួយ ដែលជាភាគីសំខាន់ សម្រាប់រាល់ដំណើរការប្រឡងផងដែរ។

កិច្ចប្រជុំនេះរៀបចំឡើងដើម្បីណែនាំពង្រឹងបន្ថែមពីគោលការណ៍ និង​បច្ចេក​ទេស​ជំរុញ​​ឱ្យ​ដំណើរ​ការ​ស្រង់​បូក​ពិន្ទុដោយកុំព្យូទ័រ និងផ្ទៀងផ្ទាត់​លទ្ធផល​នៃ​ការ​ប្រឡង​សញ្ញា​បត្រ​មធ្យម​សិក្សាទុ​តិយភូមិ សម័យប្រឡង៖ ២៨ សីហា ២០២៥ អនុវត្តដោយភាពត្រឹមត្រូវ តាម​បច្ចេក​ទេស​ស្រប​តាម​គោលការណ៍ច្បាប់យុត្តិធម៌ តម្លាភាព និងលទ្ធផលទទួលយកបានប្រកបសុក្រឹតភាព ដែល​ឆ្លុះប​ញ្ជាំងពីសមត្ថភាពពិតប្រាកដរបស់បេក្ខជនប្រឡង “ចេះគឺជាប់”។

ក្នុងកិច្ចប្រជុំនេះ ឯកឧត្តម ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ បានផ្ត​ល់អនុ​សាស​ន៍​មួយចំនួន (១) ឱ្យមានការបន្ត​ពង្រឹង​សមត្ថ​ភាព​ក្រុម​ការងារ​នៅ​គ្រប់​ដំណាក់​កាល​ទាំង​អស់ ជាពិសេសការពង្រឹងសមត្ថភាពក្រុមមុខវិជ្ជា (២) ពិនិត្យយន្តការត្រួតពិនិត្យផ្ទៀងផ្ទាត់ ធានា​ឱ្យ​បាន​នូវសុក្រឹតភាព (៣) ចំណុចសំខាន់ គឺអ្នកបញ្ចូលពិន្ទុ ត្រូវហ្មត់ចត់ និងច្បាស់លាស់ (៤) បន្តពង្រឹងវិន័យ ហាមឃាត់​ឱ្យ​បាន​ជា​ដាច់​ខាត​នូវ​ការ​ប្រើ​ប្រាស់​ទូរស័ព្ទ​ដៃ​ក្នុង​អំឡុង​ពេល​អនុវត្ត​ការងារ ​(៥) ការផ្ទៀងផ្ទាត់៖ សូមរៀបចំក្រុមការងារដើរត្រួតពិនិត្យ និងត្រូវមានយន្តការ Spot Check (៦) សូមក្រុមការងាររក្សាសុខភាពឱ្យរឹងមាំ និងស្មារតីនឹងនរ ហ្មត់ចត់ ច្បាស់​លាស់​ក្នុង​ការ​បំពេញការងារនេះ រហូតដល់បញ្ចប់គ្រប់ដំណាក់កាលដោយជោគជ័យ។

ឯកឧត្តម ឧបនាយករដ្ឋមន្ត្រី ក៏បានកោតសសើរ និងថ្លែងអំណរ​គុណ​យ៉ាង​ជ្រាល​ជ្រៅ​ដល់​ក្រុមកា​រងារ​អង្គភាពប្រឆាំងអំពើពុករលួយ ដែលបានចូលរួមគាំទ្រនូវគ្រប់ដំណាក់កាល ធ្វើឱ្យដំណើរ​ការ​នៃ​ការ​ប្រឡងឆ្នាំនេះប្រព្រឹត្តទៅដោយរលូន និងជោគជ័យហើយក៏សូមថ្លែងអំណរគុណ និង​វាយ​តម្លៃ​ខ្ពស់​ចំពោះការខិតខំប្រឹងប្រែងយកអស់កម្លាំងកាយចិត្តបំពេញ​ភារកិច្ច​ប្រកប​ដោយ​ការ​ទទួល​ខុស​ត្រូវ​ខ្ពស់របស់គណៈកម្មការទាំងអស់ ចាប់តាំងពីការចាប់ផ្តើមកា​រប្រឡង​រហូត​ដល់​កំណែ​ចប់​សព្វ​គ្រប់​ ដោយគូសបញ្ជាក់ថា ក្រសួងនឹងបន្តវាយតម្លៃគ្រប់ដំណាក់កាល (ការសំណេរ កំណែ និង​បូកស្រង់ពិន្ទុ និងផ្ទៀងផ្ទាត់) ដើម្បីបន្ត​កែល​ម្អយន្ត​ការ​រៀប​ចំ​ការ​ប្រឡង​សញ្ញាបត្រ​មធ្យម​សិក្សា​ទុតិ​យភូមិ ឱ្យកាន់តែល្អប្រសើរពីមួយឆ្នាំទៅមួយឆ្នាំ។

សូមបញ្ជាក់ថា ដំណាក់កាលបូកពិន្ទុដោយកុំព្យូទ័រ និងផ្ទៀងផ្ទាត់ពិន្ទុ មានរយៈពេល១០ថ្ងៃ និង​ត្រូវ​បំពេញការងារពេញម៉ោង មិនអនុញ្ញាតឱ្យបញ្ចប់មុនម៉ោងកំណត់ ឬថ្ងៃកំណត់ឡើយ។ ក្រសួង​បាន​កំណត់ យកថ្ងៃទី២០ ខែកញ្ញា ឆ្នាំ២០២៥ សម្រាប់ប្រកាសលទ្ធផលប្រឡង តាមមណ្ឌល​សំណេរ​នៃរាជធានី ខេត្តទាំង២៥ នៅទូទាំងប្រទេស៕ អត្ថបទ៖ គឹមហុក