ក្រុមហាម៉ាស បាននិយាយកាលពីថ្ងៃអាទិត្យថា ខ្លួនបានត្រៀមរួចជាស្រេចដើម្បីពិភាក្សាពីការដោះលែងចំណាប់ខ្មាំងទាំងអស់ជាថ្នូរនឹងការបញ្ចប់សង្គ្រាមនៅហ្កាហ្សា ការដកទ័ពអ៊ីស្រាអែលពេញលេញ និងការបង្កើតគណៈកម្មាធិការឯករាជ្យប៉ាឡេស្ទីនដើម្បីគ្រប់គ្រងតំបន់ហ្កាហ្សាស្ទ្រីប។

ចលនាប៉ាឡេស្ទីនបាននិយាយថា ខ្លួនបានទទួលគំនិតតាមរយៈអន្តរការី ពីភាគីអាមេរិកសម្រាប់កិច្ចព្រមព្រៀងបទឈប់បាញ់ និងស្វាគមន៍គំនិតផ្តួចផ្តើមណាមួយដែលមានបំណងបញ្ឈប់ការប្រយុទ្ធគ្នា។

ក្រុមហាម៉ាស ក៏បានអំពាវនាវឱ្យមានការធានានូវ "ការប្តេជ្ញាចិត្តច្បាស់លាស់ និងជឿជាក់ ផងដែរ ពីសំណាក់អ៊ីស្រាអែលចំពោះកិច្ចព្រមព្រៀងណាមួយ ដោយព្រមានប្រឆាំងនឹងការកើតឡើងម្តងទៀតនៃកិច្ចព្រមព្រៀងកន្លងមក ដែលខ្លួនបាននិយាយថាត្រូវបានបដិសេធ ឬបោះបង់ចោល។

មន្ត្រីអ៊ីស្រាអែលម្នាក់ដែលសុំមិនបញ្ចេញឈ្មោះបាននិយាយថា អ៊ីស្រាអែលកំពុង ពិចារណាយ៉ាងម៉ត់ចត់ លើសំណើរបស់សហរដ្ឋអាមេរិក ដែលត្រូវបានប្រគល់ជូនក្រុមហាម៉ាស កាលពីចុងសប្តាហ៍ ហើយបានហៅជាសំណើរបស់ប្រធានាធិបតី Donald Trump។

លោក Donald Trump បាននិយាយថា រដ្ឋបាលរបស់លោកកំពុងធ្វើការលើដំណោះស្រាយមួយដែលអាចល្អសម្រាប់តំបន់ហ្កាហ្សា ប៉ុន្មានម៉ោងក្រោយចេញការព្រមានដល់ក្រុមហាម៉ាសដែលលោកហៅថាជាការព្រមានចុងក្រោយ។ លោកថាកិច្ចព្រមព្រៀងហ្កាហ្សា អាចនឹងកើតឡើងក្នុងពេលឆាប់ៗនេះ ៕