កូដកម្មរយៈពេល ៥ថ្ងៃតាមប្រព័ន្ធដឹកជញ្ជូនក្រោមដី នៅទីក្រុងឡុងដ្រ៍ របស់ចក្រភពអង់គ្លេស បានចាប់ផ្តើមនៅថ្ងៃអាទិត្យ (ទី៧ ខែកញ្ញា) ដោយគំរាមកំហែងដល់ការធ្វើដំណើររបស់មនុស្សរាប់លាននាក់ និងរំខានដល់ជីវិតប្រចាំថ្ងៃនៅទីក្រុងនេះ ខណៈហ្វូងកម្មករចេញតវ៉ាពីប្រាក់ឈ្នួល និងលក្ខខណ្ឌការងារ។

បណ្ដាញដឹកជញ្ជូនទីក្រុងឡុងដ្រ៍ ដែលជាអាជ្ញាធរដឹកជញ្ជូនរបស់ទីក្រុងនេះ បានព្រមានថា "សេវាកម្មតិចតួច ឬគ្មានទាល់តែសោះ" ត្រូវបានរំពឹងទុកនៅទូទាំងបណ្តាញផ្លូវក្រោមដី ដែលត្រូវបានគេស្គាល់ថា Tube ចាប់ពីថ្ងៃទី៨ ដល់ថ្ងៃទី១១ ខែកញ្ញា ហើយនិយាយថា សេវាកម្មនឹងត្រូវធ្វើឡើងមានកម្រិតនៅថ្ងៃទី១៤ ខែកញ្ញា។

ការធ្វើដំណើររបស់ប្រជាជនរហូតដល់ ៥លាននាក់ បានកើតឡើងជារៀងរាល់ថ្ងៃនៅលើបណ្ដាញផ្លូវក្រោមដីរបស់ទីក្រុងឡុងដ្រ៍ ដែលមានស្ថានីយចំនួន ២៧២កន្លែង និងខ្សែធ្វើដំណើរចំនួន១១ ដែលឆ្លងកាត់ទីក្រុង និងនៅជាយក្រុងជុំវិញនោះ។

សមាជិកនៃសហជីពជាតិកម្មករផ្លូវដែក ដែនសមុទ្រ និងដឹកជញ្ជូន កាលពីខែមុនបានប្រកាសពីផែនការធ្វើកូដកម្មនេះ ដោយមានក្រុមកម្មករមកពីគ្រប់វិស័យ ប្រមូលផ្ដុំគ្នាធ្វើសកម្មភាពកូដកម្ម ដោយលើកឡើងពីភាពហត់នឿយខ្លាំង "វេនការងារដ៏លំបាក" និងប្រាក់ឈ្នួលទាប។

អាជ្ញាធរដឹកជញ្ជូនទីក្រុងឡុងដ្រ៍និយាយថា ខ្លួនកំពុង "ប្រឹងប្រែងដោះស្រាយជម្លោះ" ហើយជំរុញឱ្យសហជីពផ្អាកកូដកម្ម ដោយនិយាយថា ខ្លួនកំពុងផ្តល់សំណើដំឡើងប្រាក់ឈ្នួល ៣,៤% ដល់បុគ្គលិកធ្វើការនៅផ្លូវក្រោមដីទាំងអស់ក្នុងទីក្រុងឡុងដ្រ៍។ ប៉ុន្តែសហជីពនិយាយថា ចំណុចជាប់គាំងចម្បងក្នុងកិច្ចពិភាក្សានោះ គឺជាការទាមទាររបស់ខ្លួនសម្រាប់កាត់បន្ថយម៉ោងការងារសម្រាប់កម្មករ៕