ក្រុមអ្នកជំនាញបាននិយាយកាលពីថ្ងៃអាទិត្យ (៧ កញ្ញា) ថា ការដាច់ខ្សែកាប្លិ៍ក្រោមបាតសមុទ្រនៅសមុទ្រក្រហម បានរំខានដល់ការចូលប្រើប្រាស់អ៊ីនធឺណិតនៅក្នុងតំបន់អាស៊ី និងមជ្ឈិមបូព៌ា ហើយគេមិនច្បាស់ទេថាមូលហេតុអ្វីដែលបណ្តាលឱ្យមានឧបទ្ទវហេតុនេះកើតឡើង។

មានក្ដីបារម្ភថា ខ្សែកាប្លិ៍ក្រោមបាតសមុទ្រនោះត្រូវកំណត់គោលដៅក្នុងយុទ្ធនាការសមុទ្រក្រហមដោយក្រុមឧទ្ទាមហ៊ួទី របស់ប្រទេសយេម៉ែន ក្នុងកិច្ចខិតខំប្រឹងប្រែងដើម្បីដាក់សម្ពាធលើអ៊ីស្រាអែល ឱ្យបញ្ចប់សង្គ្រាមលើក្រុមហាម៉ាស នៅតំបន់ហ្កាហ្សាស្ទ្រីប។ ប៉ុន្តែនាពេលកន្លងមក ក្រុមហ៊ួទី បានបដិសេធថាមិនបានវាយប្រហារលើខ្សែកាប្លិ៍នេះទេ។

ខ្សែកាប្លិ៍បាតសមុទ្រគឺជាឆ្អឹងខ្នងដ៏សំខាន់មួយនៃអ៊ីនធឺណិតសកល រួមជាមួយនឹងតំណភ្ជាប់ផ្កាយរណប និងខ្សែកាប្លិ៍ក្រោមដី។ ជាធម្មតា ក្រុមហ៊ុនផ្តល់សេវាអ៊ីនធឺណិតមានចំណុចចូលដំណើរការច្រើនផ្នែក ហើយប្តូរទិសចរាចរណ៍អ៊ីនធឺណិតប្រសិនបើមានការរំខាន ប៉ុន្តែការដាច់បណ្ដាញបែបនេះអាចបង្កភាពរអាក់រអួលសម្រាប់អ្នកប្រើប្រាស់។

ក្រុមហ៊ុន Microsoft រួមទាំងក្រុមហ៊ុនមួយចំនួនទៀត បានប្រកាសថា បណ្ដាញនៅមជ្ឈិមបូព៌ា "អាចជួបប្រទះភាពយឺតយ៉ាវកើនឡើង ដោយសារតែការដាច់ខ្សែកាប្លិ៍ក្រោមសមុទ្រក្រហម"។ NetBlocks ដែលជាបណ្ដាញឃ្លាំមើលការចូលប្រើអ៊ីនធឺណិតសកល បាននិយាយថា "ការដាច់ខ្សែកាប្លិ័ក្រោមបាតសមុទ្រជាបន្តបន្ទាប់នៅក្នុងសមុទ្រក្រហម បានធ្វើឱ្យខូចសេវាអ៊ីនធឺណិតនៅក្នុងប្រទេសជាច្រើន" ដែលក៏រួមមានឥណ្ឌា និងប៉ាគីស្ថានផងដែរ៕