យោធាអ៊ីស្រាអែល នៅថ្ងៃអង្គារ (៩ កញ្ញា) នេះ បានទម្លាក់ខិតបណ្ណ បញ្ជាឱ្យប្រជាជននៅទីក្រុងហ្កាហ្សា ត្រូវតែជម្លៀសខ្លួនជាបន្ទាន់ មុនពេលការវាយលុកថ្មីមួយដើម្បីដណ្តើមកាន់កាប់ទីក្រុងដ៏ធំបំផុតរបស់ដែនដីហ្កាហ្សាស្រ្ទីប ជាផ្នែកមួយនៃផែនការកាន់កាប់ក្រុងដែលជិតមកដល់ ដែលបានធ្វើឱ្យអន្តរជាតិខឹងសម្បារ និងព្រួយបារម្ភពីជោគវាសនានៃទឹកដីទាំងមូល។

ការដណ្តើមកាន់កាប់ទីក្រុងដែលមានប្រជាជនប៉ាឡេស្ទីន ១លាននាក់នេះ ធ្វើឱ្យស្មុគស្មាញដល់កិច្ចខិតខំប្រឹងប្រែងបទឈប់បាញ់ដើម្បីបញ្ចប់សង្រ្គាមជិត ២ឆ្នាំមកនេះ ខណៈលោកនាយករដ្ឋមន្រ្តីអ៊ីស្រាអែល Benjamin Netanyahu ទទូចធ្វើតាមផែនការរបស់លោកក្នុងការកម្ទេចបន្ទាយចំនួនពីរដែលនៅសល់របស់ក្រុមហាម៉ាស។

លោក Netanyahu និយាយថា អ៊ីស្រាអែលគ្មានជម្រើសអ្វីក្រៅតែពីបញ្ចប់ការងារ និងកម្ចាត់ក្រុមហាម៉ាស ដោយសារក្រុមសកម្មប្រយុទ្ធប៉ាឡេស្ទីននេះបដិសេធមិនព្រមទម្លាក់អាវុធ។ ក្រុមហាម៉ាសប្រកែកថា ខ្លួននឹងមិនព្រមរំសាយអាវុធទេ លុះត្រាតែមានរដ្ឋប៉ាឡេស្ទីនឯករាជ្យមួយត្រូវបង្កើតឡើង។

អ្នករិះគន់អន្តរជាតិនិយាយថា ផែនការរបស់អ៊ីស្រាអែល — ដែលរួមមានការរំសាយកម្លាំងយោធាលើដែនដីនេះទាំងមូល នៅពេលដែលអ៊ីស្រាអែលគ្រប់គ្រងផ្នែកសន្តិសុខនោះ — អាចធ្វើឱ្យស្ថានភាពមនុស្សធម៌នៃចំនួនប្រជាជន ២,២លាននាក់ កាន់តែស៊ីជម្រៅ ខណៈទឹកដីនេះកំពុងប្រឈមមុខនឹងហានិភ័យធ្ងន់ធ្ងរនៃគ្រោះទុរ្ភិក្សរួចទៅហើយ។

កិច្ចខិតខំប្រឹងប្រែងសម្រុះសម្រួលដោយសហរដ្ឋអាមេរិក កាតា និងអេហ្ស៊ីប បានបរាជ័យមិនអាចបង្រួមការខ្វែងគំនិតគ្នាបានឡើយរវាងអ៊ីស្រាអែល និងក្រុមហាម៉ាស ដើម្បីទទួលបានបទឈប់បាញ់ និងការដោះលែងចំណាប់ថ្នូរនៅសេសសល់ ដែលក្រុមហាម៉ាស បានចាប់ខ្លួនទៅតំបន់ហ្កាហ្សា៕