ប្រទេសស៊ីរី «បានថ្កោលទោសយ៉ាងខ្លាំង» ចំពោះការវាយប្រហាររបស់អ៊ីស្រាអែលទៅលើទីតាំងជាច្រើនកន្លែងនៅក្នុងនិងជុំវិញទីក្រុង Homs នៅភាគខាងលិចប្រទេស និងនៅជុំវិញទីក្រុងឆ្នេរLatakia។ ក្រសួងការបរទេសរបស់ប្រទេស បាននិយាយនៅក្នុងសេចក្តីថ្លែងការណ៍ថា ការវាយប្រហារតាមអាកាសរបស់អ៊ីស្រាអែលនៅព្រឹកព្រលឹមថ្ងៃអង្គារនេះ បានបង្ហាញពី «ការរំលោភពិតប្រាកដលើដែនអធិបតេយ្យភាពរបស់សាធារណរដ្ឋអារ៉ាប់ស៊ីរី»។

ទីភ្នាក់ងារសារព័ត៌មានផ្លូវការស៊ីរី (SANA) បាននិយាយថា ក្រសួងក៏បានចាត់ទុកការវាយប្រហាររបស់អ៊ីស្រាអែលថាជាការគំរាមកំហែងដោយផ្ទាល់ដល់សន្តិសុខប្រទេសស៊ីរី និងស្ថិរភាពនៅក្នុងតំបន់។ 

ក្រុមឃ្លាំមើលសិទ្ធិមនុស្សស៊ីរី (SOHR) មានមូលដ្ឋាននៅចក្រភពអង់គ្លេស បាននិយាយថា យន្តហោះចម្បាំងអ៊ីស្រាអែល បានវាយប្រហារមូលដ្ឋានទ័ពអាកាសស៊ីរី នៅក្នុងទីក្រុងហូម ជាកន្លែងដែលអ្នកស្រុកបានឮការផ្ទុះដ៏ខ្លាំង ទោះបីជាគ្មានរបាយការណ៍ដំបូងអំពីអ្នកស្លាប់និងរងរបួសក៏ដោយ។

នៅទីក្រុង Latakia យន្តហោះចម្បាំងរបស់អ៊ីស្រាអែល បានវាយប្រហារបន្ទាយយោធា ហើយអ្នកស្រុកបានរាយការណ៍ថា រថយន្តគិលានសង្គ្រោះ បានប្រញាប់ប្រញាល់ទៅកាន់កន្លែងកើតហេតុនៃការវាយប្រហារ។

ក្រសួងការបរទេស បានអំពាវនាវដល់សហគមន៍អន្តរជាតិ ជាពិសេសក្រុមប្រឹក្សាសន្តិសុខអង្គការសហប្រជាជាតិ ឱ្យប្រកាន់ជំហរច្បាស់លាស់និងរឹងមាំ ដើម្បីបញ្ចប់ការវាយប្រហាររបស់អ៊ីស្រាអែល ដែលក្រសួងបាននិយាយថា ជាការរំលោភច្បាប់អន្តរជាតិ និងគោលការណ៍នៃធម្មនុញ្ញអង្គការសហប្រជាជាតិ។