អំឡុងជំនួបនៅក្នុងទីក្រុងប៉េកាំងនាថ្ងៃអង្គារនេះ នាយករដ្ឋមន្រ្តីព័រទុយហ្គាល់លោក Luis Montenegro បានជំរុញប្រធានាធិបតីចិនលោក Xi Jinping ប្រើប្រាស់ទំនាក់ទំនងជិតស្និតប្រទេសរបស់លោកជាមួយរុស្ស៊ី ដើម្បីជំរុញឲ្យមានសន្តិភាពយូរអង្វែង និងយុត្តិធម៌ត្រឹមត្រូវនៅប្រទេសអ៊ុយក្រែន ។

ដំណើរទស្សនកិច្ចរបស់លោក Montenegro មកកាន់ប្រទេសចិន គឺជាដំណើរទស្សនកិច្ចលើកដំបូងគេដោយប្រមុខរដ្ឋាភិបាលព័រទុយហ្គាល់ ក្នុងរយៈពេលជិត ១ទសវត្សរ៍កន្លងមកនេះ ។ វាបានកើតមានឡើងរយៈពេល ១សប្តាហ៍ ក្រោយលោក Xi រៀបចំពិធីដង្ហែរព្យុហយាត្រាយោធាទ្រង់ទ្រាយធំនៅក្នុងទីក្រុងប៉េកាំង ជាការប្រារព្ធខួបរយៈពេល ៨០ឆ្នាំ ចាប់តាំងបរាជ័យសង្រ្គាមលោកលើកទី ២របស់ជប៉ុន អមដំណើរដោយប្រធានាធិបតីរុស្ស៊ីលោក Vladimir Putin និងមេដឹកនាំកូរ៉េខាងជើងលោក Kim Jong Un គឺជាអ្វីមួយដែលប្រធានគោលនយោបាយបរទេសសហភាពអឺរ៉ុបលោក Kaja Kallas ចាត់ទុកថាជា “សម្ព័ន្ធភាពបែបផ្តាច់ការ” ។

ក្រោយដំណើរទស្សនកិច្ចរយៈពេលច្រើនថ្ងៃមកកាន់ប្រទេសចិន លោក Montenegro នឹងបន្តដំណើរទៅកាន់ប្រទេសជប៉ុន សម្រាប់ដំណើរទស្សនកិច្ចផ្លូវរដ្ឋ ស្របពេលដែលទីក្រុង Lisbon ស្វែងរកទំនាក់ទំនងជិតស្និតជាងមុនជាមួយប្រទេសសេដ្ឋកិច្ចធំបំផុតទាំង ២ប្រចាំអាស៊ី ក្រោយពុំមានទំនាក់ទំនងកម្រិតខ្ពស់អស់រយៈពេលជាច្រើនឆ្នាំ ។

បន្ទាប់ពីរងផលប៉ះពាល់ខ្លាំងដោយសារពន្ធរដ្ឋបាលរបស់លោកប្រធានាធិបតី Donald Trumpដែលបានកាត់បន្ថយការនាំចេញទៅកាន់សហរដ្ឋអាមេរិក បច្ចុប្បន្នទីក្រុង Lisbon ព្យាយាមស្វែងរកទំនាក់ទំនងពាណិជ្ជកម្មខ្លាំងក្លាជាងមុនជាមួយចិន បើទោះបីជាសហភាពអឺរ៉ុបចោទប្រកាន់ប្រទេសមហាអំណាចសេដ្ឋកិច្ចធំបំផុតទី ២របស់ពិភពលោកមួយនេះថា ធ្វើឲ្យមានការជោរជន់ទំនិញថោកៗពាសពេញតំបន់ និងជំរុញសេដ្ឋកិច្ចសង្រ្គាមរុស្ស៊ីក៏ដោយ ៕