តម្លៃប្រេងបានកើនឡើងជាថ្មីម្ដងទៀតនៅថ្ងៃពុធ (១០ កញ្ញា) នេះ បន្ទាប់ពីអ៊ីស្រាអែល បានបើកការវាយប្រហារទៅលើថ្នាក់ដឹកនាំក្រុមសកម្មប្រយុទ្ធហាម៉ាស នៅក្នុងប្រទេសកាតា ហើយប្រធានាធិបតីអាមេរិក លោក Donald Trump បានស្នើឱ្យអឺរ៉ុប ដាក់ពន្ធលើអ្នកទិញប្រេងរុស្ស៊ី ប៉ុន្តែចក្ខុវិស័យទីផ្សារទន់ខ្សោយ បានទប់កំណើនតម្លៃប្រេងមិនឱ្យហក់ឡើងខ្លាំងពេក។

ភាគហ៊ុនប្រេងឆៅរបស់ Brent បានកើនឡើង ៣៥សេន ឬ ០,៥៣% ដល់ ៦៦,៧៤ដុល្លារ ក្នុងមួយបារ៉ែល គិតត្រឹមម៉ោងសកល ០០:៣៣នាទី រំលងអាធ្រាត្រឈានចូលថ្ងៃពុធនេះ ខណៈហ៊ុនប្រេងឆៅរបស់អាមេរិក WTI បានកើនឡើង ៣៦សេន ឬ ០,៥៧% ដល់តម្លែ ៦២,៩៩ដុល្លារ ក្នុងមួយបារ៉ែល។

ដំបូងឡើយ តម្លៃបានកើនឡើងខ្ពស់ជាងនេះ ដល់ទៅ ០,៦% ក្នុងវគ្គជួញដូរមុន បន្ទាប់ពីអ៊ីស្រាអែលវាយប្រហារលើថ្នាក់ដឹកនាំហាម៉ាស នៅទីក្រុងដូហា ប៉ុន្តែកំណើនក៏បានថយបន្តិចវិញ ដែលត្រូវបានវិនិយោគិនមើលឃើញថាព្រោះតែភាពទន់ខ្សោយនៃទីផ្សាររួម។ សន្ទស្សន៍តម្លៃទាំងពីរក៏ធ្លាប់កើនឡើងជិត ២% ភ្លាមៗបន្ទាប់ពីការវាយប្រហារនោះ ប៉ុន្តែបន្ទាប់មកបានធ្លាក់វិញ បន្ទាប់ពីអាមេរិក បានប្រាប់ទីក្រុងដូហាថា រឿងបែបនេះនឹងមិនកើតឡើងម្តងទៀតនៅលើទឹកដីរបស់ខ្លួននោះឡើយ។

លើសពីនេះទៅទៀត ការប្រែប្រួលតម្លៃទីផ្សារប្រេងក៏កើតឡើង បន្ទាប់ពីសេចក្ដីរាយការណ៍ថា លោក Trump បានជំរុញប្លុកអឺរ៉ុប ឱ្យដាក់ពន្ធ ១០០% លើចិន និងឥណ្ឌា ជាយុទ្ធសាស្រ្តដាក់សម្ពាធលើប្រធានាធិបតីរុស្ស៊ី លោក Vladimir Putin ឱ្យប្រឹងប្រែងក្នុងដំណើរការសន្តិភាពអ៊ុយក្រែន៕