រដ្ឋមន្ត្រីក្រសួងរតនាគារលោក Scott Bessent បាននិយាយបន្ទាប់ពីកិច្ចពិភាក្សាជាមួយបេសកជនទទួលបន្ទុកដាក់ទណ្ឌកម្មរបស់សហភាពអឺរ៉ុប កាលពីថ្ងៃចន្ទ (ទី៨ ខែកញ្ញា) ថា សហរដ្ឋអាមេរិក មានឆន្ទៈចាត់វិធានការយ៉ាងម៉ឺងម៉ាត់ និងខ្លាងក្លាលើរុស្ស៊ី ជុំវិញសង្រ្គាមអ៊ុយក្រែន ប៉ុន្តែកិច្ចសហប្រតិបត្តិការពេញលេញរបស់អឺរ៉ុប នៅតែមានសារៈសំខាន់ណាស់។

ការអត្ថាធិប្បាយរបស់លោក Bessent នេះបានកើតឡើងនៅពេលដែលក្រុមមន្ត្រីសហរដ្ឋអាមេរិក និងសមភាគីសហភាពអឺរ៉ុប បានបើកកិច្ចប្រជុំនៅថ្ងៃចន្ទ និងថ្ងៃអង្គារ ស្តីពីការបង្កើនការសម្របសម្រួលពាក់ព័ន្ធនឹងការដាក់ទណ្ឌកម្មលើទីក្រុងមូស្គូ។

លោក Bessent បានសរសេរនៅក្នុងការបង្ហោះលើបណ្ដាញសង្គម X បន្ទាប់ពីកិច្ចប្រជុំនោះថា "ជម្រើសទាំងអស់នៅតែមាននៅលើតុពិភាក្សា" ជាផ្នែកមួយនៃយុទ្ធសាស្រ្តរបស់លោកប្រធានាធិបតីអាមេរិក Donald Trump ដើម្បីគាំទ្រដល់ការចរចាសន្តិភាពរវាងទីក្រុងមូស្គូ និងទីក្រុងគីវ។ លោកក៏បានសង្កត់ធ្ងន់ថា អាមេរិក និងសហភាពអឺរ៉ុបសុទ្ធតែជាភាគីសំខាន់នៃការបញ្ចប់សង្រ្គាមនៅអ៊ុយក្រែន។

លោក Trump បានគំរាមកាលពីថ្ងៃអាទិត្យចុងសប្ដាហ៍មុនថា លោកនឹងដាក់ទណ្ឌកម្មបន្ថែមទៀតលើរុស្ស៊ី បន្ទាប់ពីវិមានក្រឹមឡាំងបានបញ្ចេញរលកវាយប្រហារតាមអាកាសដ៏ធំមិនធ្លាប់មានលើអ៊ុយក្រែន។ លោក Trump ក៏បានគំរាមដាក់ទណ្ឌកម្មលើប្រទេសណាដែលទិញប្រេងពីរុស្ស៊ី ដើម្បីកាត់ផ្តាច់ប្រភពចំណូលដ៏សំខាន់សម្រាប់គាំទ្រសង្គ្រាមរបស់មេដឹកនាំរុស្ស៊ី លោក Vladimir Putin ប៉ុន្តែរហូតមកដល់ពេលនេះ លោកចាត់វិធានការពន្ធតែលើឥណ្ឌាមួយប៉ុណ្ណោះ ក្នុងអ្វីដែលហៅថាទណ្ឌកម្មបន្ទាប់បន្សំ៕