ទាហានប្រដាប់អាវុធ បានយាមកាមតាមដងផ្លូវនានាក្នុងរដ្ឋធានីប្រទេសនេប៉ាល់ នៅថ្ងៃពុធ (១០ កញ្ញា) នេះ ដោយបានបញ្ជាឱ្យប្រជាជនស្នាក់នៅក្នុងផ្ទះ ក្នុងការប៉ុនប៉ងស្តារសណ្តាប់ធ្នាប់ឡើងវិញ បន្ទាប់ពីបាតុកររាប់ម៉ឺននាក់បានសម្រុកចូល និងដុតបំផ្លាញអគាររដ្ឋាភិបាល និងវាយប្រហារអ្នកនយោបាយ។

ទាហានដែលមានអាវុធក្នុងដៃ បានទៅការពារតំបន់សំខាន់ៗនៃទីក្រុងកដ្ឋមណ្ឌូ ហាក់ដូចជាផ្តល់នូវភាពមានការគ្រប់គ្រង ត្រឡប់ទៅទីក្រុងនេះវិញ ដែលបានរងគ្រោះដោយអំពើហិង្សា និងចលាចល។ ទាហានប្រាប់ប្រជាជនកដ្ឋមណ្ឌូថា បម្រាមគោចរនៅមានសុពលភាព ហើយឆែកឆេរយានយន្ត និងត្រួតពិនិត្យមនុស្ស ហើយបាននិយាយថា ជនសង្ស័យជាចោរលួចជាង ២០នាក់ត្រូវបានចាប់ខ្លួន។

កងទ័ពបានព្រមាននៅក្នុងសេចក្តីប្រកាសមួយកាលពីល្ងាចថ្ងៃអង្គារថា កងកម្លាំងសន្តិសុខបានប្ដេជ្ញារក្សាច្បាប់ និងសណ្តាប់ធ្នាប់។ គួរឱ្យដឹងថា កងទ័ពនេប៉ាល់កម្រត្រូវបានកេណ្ឌដាក់ពង្រាយបែបនេះណាស់ ហើយមកទល់ពេលនេះ ទាហាននៅតែបន្តនៅក្នុងបន្ទាយរបស់ខ្លួន ប៉ុន្តែនគរបាលអាចគ្រប់គ្រងស្ថានការណ៍បានទេ ទើបត្រូវការជំនួយពីកងទ័ព។

បាតុកម្មបានផ្ទុះឡើងដំបូងនៅថ្ងៃចន្ទ (៨ កញ្ញា) សប្ដាហ៍នេះ ដឹកនាំដោយយុវជន ដែលខឹងសម្បារចំពោះការបិទគេហទំព័រប្រព័ន្ធផ្សព្វផ្សាយសង្គមជាច្រើន ដោយយសម្រុកតវ៉ាពាសពេញរដ្ឋធានី ហើយនគរបាលបានបើកការបាញ់ប្រហារលើហ្វូងមនុស្ស បង្កការស្លាប់ ១៩នាក់។ ការហាមឃាត់ប្រព័ន្ធផ្សព្វផ្សាយសង្គមត្រូវបានដកចេញកាលពីថ្ងៃអង្គារ ប៉ុន្តែការតវ៉ានៅតែបន្តយ៉ាងតានតឹង៕