ឆ្លងកាត់កិច្ចប្រជុំចរចាប្រាក់ឈ្នួលអប្បរមាកម្មករនិយោជិតវិស័យកាត់ដេរ រយៈពេលជាច្រើនលើក ច្រើនសារកន្លងមកនេះ ជាលទ្ធផលកិច្ចប្រជុំចរចាប្រាក់ឈ្នួលអប្បបរមាលើកទី៣ ថ្ងៃទី១០ ខែកញ្ញានេះ បានបង្ហាញឲ្យដឹងថា ភាគីសហជីពតំណាងកម្មករនិយោជិត និងភាគីនិយោជក បានឯកភាពគ្នារក្សានូវតួលេខប្រាក់ឈ្នួលដដែល គឺចំនួន២០៨ដុល្លារ ដោយរងចាំការសម្រេចជាផ្លូវការរបស់ប្រមុខរាជរដ្ឋាភិបាលកម្ពុជានៅថ្ងៃទី១៧ ខែកញ្ញាខាងមុខ។
ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាជាតិប្រាក់ឈ្នួលអប្បបរមា នៅក្រោយបញ្ចប់កិច្ចប្រជុំនេះ បានមានប្រសាសន៍ប្រាប់ក្រុមអ្នកសារព័ត៌មានឲ្យដឹងថា ក្រោយចប់កិច្ចប្រជុំលើកទី៣នេះ សម្រេចបានលទ្ធផលដោយឯកភាពជាឯកច្ឆ័នពីភាគីសហជីព និងនយោជក ថានឹងមិនលើកតួលេខណាមួយដើម្បីជជែកគ្នានោះទេ ដោយផ្អែកទៅលើស្ថានភាពបច្ចុប្បន្នទីផ្សារការងារដែលយើងត្រូវរួមគ្នាពង្រីកសម្រាប់ស្វាគមន៍យុវជនដែលត្រូវដល់វ័យរកការងារធ្វើផង ក៏ដូចជាទទួលយកបងប្អូនពលករដែលត្រឡប់ពីប្រទេសថៃឱ្យបានការងារធ្វើកាន់តែច្រើនផងដែរ
ឯកឧត្តមរដ្ឋមន្រ្តី បានបញ្ជាក់ថា ជាមួយគ្នានេះ យើងក៏ប្រមើមើលពីស្ថានភាពពន្ធបរិកាដែលបានកំណត់ដោយសហរដ្ឋអាម៉េរិកមកបណ្តាប្រទេសនាំចេញផ្សេងៗ ដោយរង់ចាំមើលទាំងអស់គ្នា។ ឯកឧត្តម បានបន្តថា ការចរចាប្រាក់ឈ្នួលនេះគឺទុកជូនប្រមុខរាជរដ្ឋាភិបាលកម្ពុជា ដើម្បីពិនិត្យ និងសម្រេចជាក់ស្តែងដោយយោងទៅលើស្ថានភាពសង្គម និងទីផ្សារការងារ ក៏ដូចជាភាពប្រកួតប្រជែងរបស់ប្រទេសយើង។
លោក គឹម ចាន់សំណាង តំណាងភាគីសហជីព បានលើកឡើងថា ជាទូទៅគឺតែងតែចូលរួមការអនុវត្តនូវអ្វីដែលជាគោលការណ៍ និងជាច្បាប់របស់ក្រុមប្រឹក្សាជាតិប្រាក់ឈ្នួលអប្បបរមា ក៏ប៉ុន្តែសម្រាប់ឆ្នាំនេះយើងមើលឃើញពីស្ថានភាពសេដ្ឋកិច្ចកម្ពុជា និងពិភពលោកមានផលប៉ះពាល់ ប៉ុន្តែសម្រាប់ឆ្នាំនេះក្រោយពីការប្រជុំជាមួយគ្នាជាលក្ខណៈត្រីភាគី ដោយមើលឃើញពីផលប៉ះពាល់មួយនេះ ហើយយើងក៏បានយល់គ្នាអំពីគោលបំណងរួមក្នុងការធ្វើឱ្យសេដ្ឋកិច្ចកម្ពុជាប្រសើរឡើង និងរង់ចាំទទួលអ្នកវិនិយោគថ្មីមកពីវិស័យផ្សេងៗទៀត ក្រៅពីវិស័យកាត់ដេរ។
ជាមួយគ្នានេះដែរ ឧកញ៉ា ណាង សុធី តំណាងភាគីនិយោជក បានមានប្រសាសន៍ថា ដោយផ្អែកលើស្មារតីទទួលខុសត្រូវ ភាពស្និទ្ធស្នាល រវាងកម្មករនិយោជិត និងនិយោជក ឈានទៅដល់ការយោគយល់គ្នាជាអតិបរិមាដែលនិយោជកស្នើសុំមិនតម្លើង និងការឯកភាពគ្នាលើសំណើររបស់ភាគីសហជីព និងភាគីរាជរដ្ឋាភិបាល។ ជាពិសេសទៅលើសំណើរផ្សេងៗទៀត ដូចជាការស្នើសុំកាត់បន្ថយលើការចំណាយបំពេញបែបបទនាំចេញក្រៅគោលការណ៍នៃច្បាប់, សំណើរកាត់បន្ថយឯកសារគតិយុត្តិរបស់គយ កាត់បន្ថយការត្រួតពិនិត្យទំនិញវត្ថុធាតុដើម និងស្នើសុំគោលនយោបាយរបស់រាជរដ្ឋាភិបាលលើការងារពិសេសក្នុងការជំរុញរោងចក្រផលិតវត្ថុធាតុដើមវិស័យវាយនភ័ណ្ឌជាដើម ដើម្បីឱ្យវិស័យឯកជនមានប្រាក់កំរៃច្រើន ដើម្បីលើកទឹកចិត្តដល់ភាគីសហជីពក្នុងការចរចាប្រាក់ឈ្នួលអប្បបរមាសម្រាប់ឆ្នាំ២០២៧ខាងមុខ។
សូមបញ្ជាក់ថា កិច្ចចចារប្រាក់ឈ្នួលអប្បបរសម្រាប់កម្មករនិយោជិតក្នុងវិស័យកាត់ដេរ គ្រប់ភាគីទាំងអស់បានពិភាក្សាដោយផ្អែកទៅលើលក្ខណវិនិច្ឆ័យបែបសង្គម និងសេដ្ឋកិច្ច ដោយផ្តោតលើ ៧ចំណុចសំខាន់ៗ ដូចជា៖ ស្ថានភាពគ្រួសារ, អាត្រាអតិផរណា, ការចំណាយក្នុងការរស់នៅ, ផលិតភាព, ភាពប្រកួតប្រជែងរបស់ប្រទេស, ស្ថានភាពទីផ្សារការងារ និងកម្រិតចំណេញរបស់វិស័យ ក៏ដូចជាបន្ទាត់ភាពក្រីក្រ សម្រាប់ធ្វើជាមូលដ្ឋានក្នុងការពិភាក្សាប្រាក់ឈ្នួលអប្បបរមានៅកម្ពុជា។ ហើយគ្រប់ភាគីទាំងអស់ ត្រូវផ្តោតលើទិន្នន័យ និងការស្រាវជ្រាវបែបវិទ្យាសាស្រ្តដោយយោងលើលក្ខណវិនិច្ឆ័យទាំង៧ខាងលើ ដើម្បីធ្វើជាមូលដ្ឋានក្នុងការសម្របសម្រួលផ្ទៃក្នុង និងប្រកាន់គោលជំហររួមជាមួយ។ គិតត្រឹមឆ្នាំ២០២៥នេះ ប្រាក់ឈ្នួលអប្បបរមារបស់កម្មករនិយោជិតវិស័យកាត់ដេរ មានចំនួន ២០៨ដុល្លារ ក្នុង១ខែ ដោយមិនគិតពីប្រាក់អត្ថប្រយោជន៍ផ្សេងៗ៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
