ការសិក្សាថ្មីមួយបានព្រមានថា ការប្រកួតបាល់ទាត់ពិភពលោក World Cup ឆ្នាំ២០២៦ អាចជាការប្រកួតចុងក្រោយហើយរបស់អាមេរិកខាងជើង ប្រសិនបើពុំមានវិធានការបន្ស៊ាំអាកាសធាតុជាបន្ទាន់ទេនោះ ដែលបង្ហាញពីការគំរាមកំហែងអាកាសធាតុកំពុងកើនឡើងយ៉ាងអាក្រក់។

របាយការណ៍ឈ្មោះថា "Pitches in Peril" ដែលចងក្រងដោយ ក្រុមអ្នកជំនាញអាកាសធាតុ គឺអង្គការបាល់ទាត់សម្រាប់អនាគត (FFF) ចលនាសម្បុរសធម៌ គោលដៅរួម (Common Goal) និង ស្ថាប័នវិភាគអាកាសធាតុ (Jupiter Intelligence) បានរកឃើញថា ទីតាំង ១០កន្លែង ក្នុងចំណោមវេទិការៀបចំព្រឹត្តិការណ៍ World Cup ចំនួន ១៦ទីតាំង កំពុងមានហានិភ័យខ្ពស់ក្នុងការជួបប្រទះស្ថានភាពកម្ដៅខ្លាំងយ៉ាងថប់ដបង្ហើម។

នៅត្រឹមឆ្នាំ២០៥០ អត្រាជិត ៩០% នៃកីឡដ្ឋានម្ចាស់ផ្ទះរបស់អាមេរិកខាងជើង នឹងទាមទារឱ្យសម្របខ្លួនទៅនឹងកម្ដៅខ្លាំង ខណៈមួយភាគបីនៃទីតាំងប្រារព្ធព្រឹត្តិការណ៍ នឹងត្រូវប្រឈមនឹងតម្រូវការទឹក "ស្មើនឹង ឬលើសពី" ការផ្គត់ផ្គង់។ របាយការណ៍ក៏គូសបញ្ជាក់ពីហានិភ័យចំពោះទីកន្លែងប្រកួត World Cup ឆ្នាំ២០៣០ និង២០៣៤ ហើយត្រួតពិនិត្យស៊ីជម្រៅលើផលប៉ះពាល់នៃអាកាសធាតុក្តៅខ្លាំងនៅវាលស្មៅនៃទីលានប្រកួត។

របាយការណ៍បន្តថា កីឡដ្ឋានចំនួន១៤ ក្នុងចំណោម១៦ សម្រាប់ World Cup នៅសហរដ្ឋអាមេរិក កាណាដា និងម៉ិកស៊ិក បានហួសពី "កម្រិតសុវត្ថិភាព" ក្នុងឆ្នាំ២០២៥នេះ សម្រាប់គ្រោះថ្នាក់អាកាសធាតុសំខាន់ៗចំនួន៣ គឺកម្ដៅខ្លាំង ភ្លៀងយ៉ាងគំហុកដែលមិនអាចប្រកួតបាន និងទឹកជំនន់ជាដើម៕