ប្រធានាធិបតីប៉ូឡូញ Karol Nawrocki កាលពីថ្ងៃអង្គារ (ទី៩ ខែកញ្ញា) បានព្រមានថា ប្រធានាធិបតីរុស្ស៊ី លោក Vladimir Putin បានត្រៀមខ្លួនរួចជាស្រេចក្នុងការឈ្លានពានប្រទេសផ្សេងទៀត បន្ទាប់ពីលោក បានសម្រេចចិត្តចាប់ផ្តើមជម្លោះ នៅអ៊ុយក្រែន។

នៅឯសន្និសីទសារព័ត៌មានជាមួយប្រធានាធិបតីហ្វាំងឡង់ លោក Alexander Stubb នៅទីក្រុង Helsinki លោក Nawrocki បានប្រាប់អ្នកសារព័ត៌មានថា៖ «យើងមិនទុកចិត្តលើចេតនាល្អរបស់លោក Vladimir Putin ឡើយ»។

ទាំងប្រទេសប៉ូឡូញ និងហ្វាំងឡង់ មានព្រំប្រទល់ជាប់នឹងរុស្ស៊ី ហើយសមាជិករបស់អង្គការណាតូ (NATO) ទាំង២ បានចាប់ផ្ដើមមានក្ដីបារម្ភ ដោយសារការលុកលុយរបស់ទីក្រុងមូស្គូលើអ៊ុយក្រែន នៅឆ្នាំ២០២២។

ប្រធានាធិបតីប៉ូឡូញទើបជាប់ឆ្នោតថ្មីរូបនេះ បានបន្តថា៖ «ពិតណាស់ ខណៈពេលដែលរង់ចាំ សម្រាប់សន្តិភាពយូរអង្វែង សន្តិភាពអចិន្ត្រៃយ៍ ដែលចាំបាច់សម្រាប់តំបន់របស់យើង យើងជឿថា លោក Vladimir Putin បានត្រៀមខ្លួនរួចជាស្រេច ដើម្បីឈ្លានពានប្រទេសផ្សេងទៀត»។

ដោយមិនបានបញ្ជាក់អំពីវិធានការជាក់លាក់ណាមួយ លោកបានបន្ថែមថា៖ «នោះហើយជាមូលហេតុដែលយើងកំពុងអភិវឌ្ឍកងកម្លាំងប្រដាប់អាវុធរបស់យើង យើងកំពុងអភិវឌ្ឍភាពជាដៃគូ និងទំនាក់ទំនងសម្ព័ន្ធមិត្តរបស់យើង»។

លោក Nawrocki បានបញ្ជាក់ថា «គ្រោងសន្តិសុខ» នៅទូទាំងតំបន់ បានផ្លាស់ប្តូរ ហើយថា លោកប្រធានាធិបតីអាមេរិក Donald Trump គឺជា «មេដឹកនាំតែមួយគត់នៃពិភពលោកសេរី» ដែលអាចបង្ខំលោក Putin ព្រមចរចា។ កាលពីសប្តាហ៍មុន លោក Trump បានលើកឡើងពីការបញ្ជូនទាហានបន្ថែមទៀតទៅប៉ូឡូញ ខណៈដែលលោកបានស្វាគមន៍លោក Nawrocki នៅសេតវិមាន ជាមួយនឹងយន្តហោះយោធាហោះពីលើ៕